Tura, Sept 10,2024: Ia bilsini class X-o poraienggipa chatro chatrirangni SSLC selection porikkako September 30 tariko ong·atna tik ka·aniko dingtang tarikko donatskachina Garo Students’ Union (GSU) CEC HQ-ni President Zikku Balgra N. Marak SSLC Board-ni Secretary-na chitti sedoataha.
GSU President-ni chittio janapatani gitade, 2005 bilsini September 30 tarikara A·chikrangna dal·begipa kalimani aro gisik ra·beani sal ong·a. Ua tariko A·chik Matgrikrang MBOSE-na dakgrike janggitangko gimaatahani gimin uamangko gisik ra·ani sal ong·a. Uni gimin ua salo ong·atna tik ka·gimin selection porikkako dingtang salona ba tarikona ra·doatskachina didiataha.
Indake September 30 tarikni selection porikkako gipin tarikona donatanichi chatro chatrirang maming jajaani aro neng·nikani gri sianggipa A·chik Matgrikrangko gisik ra·anio bak ra·na gita man·gen ine GSU-ni President janapatan baksa SSLC Board-ni Secretary-ko mol·molataha.
