Tura, May 2, 2024: A·chik Holistic Awakening Movement (AHAM),Tura-ko Winter ba Second Capital songchina dabiani bidingo a·dok sorkarini Committee-ko songe on·ahani gimin nichake donggija aro chanchichagija Tura-ko Winter ba Second Capital songchina dabiangaha.
Tura-ko Winter Capital songchina, Garo Hills-ni dingtang dingtang NGO-rang dabitokengani gimin adita salrangna skang Assembly-ni Budget Session-o, iani bidingo chanchirimna gita pilak party-rangan bak ra·enba, Committee-ko a·dokni Skotong Minister songe on·angaha.
Ia committee-ni kamara, a·doko skotong songjinma damgni namgijanirangko am·sandie aro dingtang dingtang dolrang baksa agangrike sorkarina report-ko on·ani ong·engachim.
Indake ong·engon,Tura-ko Winter Capital songani bidingo chanchirimna sorkarini tik ka·aniko AHAM-ni President Georgeprince Ch Momin jegalatskaenba, ma·ambi aro sorkarini kamrangko nigrikesa Tura-ko Winter Capital songchina dabienga ine parakataha, Tura-ko Winter Capital songanio am·sandina nangani kattarang dongja ine parakatskaha.
Assam-o Dibrugarh-ko gnigipa skotong songjinma dake songani bidingo adita salrangna skang Skotong Minister Himanta Biswa Sarma-ni parakatgipani gimin aro Nagpur-ko ru·uta somoirangonin Maharashtra-ni gnigipa skotong songjinma dake jakkalbaengani gimin talatangaha.
Jammu & Kashmir aro Himachal Pradesh a·dokrangba apsan daken Second Capital-ko songani bidingo janapatenba, Tura-ko Winter ba Second Capital songchina AHAM dabiangaha.
