Tura, May 2,2025: Meghalaya a·doko niam gri koela bikotaniko National Green Tribunal (NGT)-ni champengataoni da·o bilsi 10 batangpilengahaoba niam gri koela bikotanirang bon·changkujaenga ine re·anggipa April 24 tariko Enforcement Directorate (ED), sandirokani ja·man, a·doko niam gri koela bikotanirangko jakgitelgipa agency-rangchi sandirokchina a·dokni Leader of Opposition (LO) dolni dilgipa aro gitcham Skotong Minister Dr. Mukul M. Sangma dabiangaha.

Dr. Sangma Bristibar salo, Jengjal Sub-Divisional Hospital-ko nina re·angani ja·man, kobor ra·timgiparang baksa agangrikengon, jakgitel ong·gipa Agency-rangchi sandirokgenchimosa, a·doko dilgiparangni aro Official-rangni, niam gri koela bikotanio jak donggiparangko parake ma·sigen ine Sangma aganaha.

A·doko niam gri koela bikotaniko Enforcement Directorate (ED), a·dokni dingtang dingtang biaprangoniko am·sandion, salprako ton 1200-mang koelarangko bikotenga ine nikna man·aha. ED, adita salnangna skang South Garo Hills a·jani Era Aning, Jadigittim aro Nongalbibra, Bongaigaon-ni Jogighopa, Tinsukia-ni Margherita aro Guwahati koela a·damrangoniko am·sandianirangko dakangaha. ED-ni koborko on·ani gitade, South Garo Hills a·jani Jadigittim jolrango koela bikotgiparang skango jakkalgipa hatturirangchi, niam gri koelarangko bikotengkua aro koela bikotanio, manager-rang, sardar-rang aro labour-rang jak dongachim.

“Indake niam gri koela bikotani bidingo chinga changni chang sorkarina u·iataha, indiba sorkari knachakgija nachil rim·tipe dongaia, na·simang gimikan nika. MMDR Act-ni Sec 21A-ni niamko pe·ani ong·a aro iako champenganide bilo ong·enggipa a·dokni dilgiparangan ong·a. Iarangko champengna gita na·simang permission-ko nangja” ineba Dr Sangma aganaha.

A·dokni dingtang dingtang pulis station-rango baditaba chang FIR-rangko ka·aha, indiba sorkari aro pulisrang iani bidingo maming ja·kurangko de·jaha ineba Opposition dolni dilgipa aganaha.

“ED-ni official-rang South Garo Hills a·jaona re·bae niam gri koela bikotaniko koela salruraaniko sakki man·aha, indiba a·dokni pulisrang, ua biapon dongkame kam ka·engoba niam gri koela bikotani aro niam gri koela salruraani maming sakkirang dongja ine aganenga. Iarang namen kragijani ong·a” ine Dr. Sangma aganaha.

Ua kamrangko bilo ong·enggipa dilgiparang aro officer-rangan dakdilenga, uni gimin iani bidingo namedake sandirokna nangchongmota, ine warachakenggipa dolni dilgipa aganaha.