Tura, August 11, 2026: Ru·utbea bilsirangoni A·chik jatni nangnikmanchae dabibaenggipa Separate Electoral Roll (SER)-ko mijal August-ni 10 tariko pass ka·aha. Ia bill-ko pass ka·ani miksongara, Garo Hills Autonomous District Council (GHADC) election-o Scheduled Tribe (ST) ong·gijagipa rorirang vote pu·on-na man·jawa ine champengatani ong·a, mikkangchi GHADC election-o ST manderangsan pu·on-na gita man·aignok ine niamko ra·gataha. Ian Assam aro Meghalaya Autonomous Districts (Constitution of District Councils) Rules 1951·o pangchake, Rule 128 aro 129-ni gnigipa (Second) Amendment Bill, 2026-ko passa ka·aha aro ia bill-ko pass ka·na gita ruling aro opposition MDC-rang apsan ku·monge, A·chik jatko chel·chakna gita, GHADC election-o rorirangni vote pu·onaniko champengsrangna ia niamko ra·gataha.

Re·anggipa March jao Rule 8-ko pass ka·aha aro ua niamara, Scheduled Tribe (ST) ong·gijagipa manderang GHADC election-o candidate ong·e chakatna ba susana man·jawa ingipa niamko tarie, ST Certificate-ko mandatory dakataha. Je manderangan GHADC election-o susagenchim, nomination file ka·ani somoio ST Certificate-ko on·chapna nangchongmotgen ingipa niamko GHADC-o ra·gataha.

Ia niamrangko bilsi 74-na king king ra·gatna man·chipjaha, indiba ia 2026 bilsini August 10 tariko Dhormonath Ch Sangma-ni CEM ong·e dilanichi ia niam be·en pil·na gita man·aha. Ian A·chik jatna namen katchabeani aro ‘Gisik Ra·beani Sal’ ba Historic Day ong·aha. GHADC-o ia niamko ra·gatna gita budget session-ni bon·kamgipa salo sak 30 donggipa MDC-rangoni sak 26 MDC-rang dongpae, chakpaaniko on·angtokaha aro bon·kamao ia niamko pass ka·aha. Ia niamko ra·gatna man·ahani gimin, budget session-o dongpagipa MDC-rang namen kusi ong·beaniko parakattokaha.

Ia niamko pass ka·na gita house-o chanchirimanio warachakenggipa MDC-rangba kusi ong·en ra·chakangaha. Indiba Rules 128 aro 129-ni chapter 9-o Scheduled Tribe-ni pal Indigenous Tribe (Garo) ingipa kattako napatchina ba ra·chapchina mol·molahachim, indiba adita sak MDC-rang Indigenous Tribe (Garo) ingipa kattako napatjaha. Uni ja·mano adita sak MDC-rangni talatani gitade, dingtangmancha Garo-na ine Indiani Constitution-o sea dongja, Scheduled Tribe-nasan provision dongaia aro Indigenous ingipa kattade General-sa ga·aka. Uni giminsa, Indigenous kattako napatna man·jaha ine parakataha.

Da·alo ia bill-ko pass ka·na gita cholko on·gipa Nokgipa Isolko mittelangenba, dakchakaniko on·gipa a·dokni Governor aro Skotong Minister-ko aro pilak an·tangni ka·rimska ruling aro opposition dolni MDC-rangkoba Dhormonath Ch.Sangma mittelpilangaha.