Ampati, May 23, 2025: Garo Students’ Union (GSU) Western Zone (South) Ampati, A·chik jat gimik aro Ampati-o songdongenggipa manderangni palo, adita salrangna skang sak 6 gipin jatrangko Ayush Medical Officer-rangna aro saksako, Yoga Instructor-ni kamna ra·aniko jegalatenba, ua officer-rangko den·galpilchina dabie, Bristibar salo South West Garo HIlls a·jani Deputy Commissioner aro District Ayush Mission-ni Chairman-na lekka sedoangaha.

GSU Western Zone-ni Deputy Commissioner aro District Ayush Mission-ni Chairman-na seatgipa chittio janapatani gitade, ge·dok Ayush Medical Officer-rangni kamrangna aro ge·sa Yoga Instructor-na Schedule Tribe category-ni candidate-rang saksakoba kamna seokjaha. Ian namen mikkrakbeani ong·enga, kobor man·ani gitade, sakgni ba sakgittam Khasi candidate-rangoni interview-na biming nakatahachim, uarangko kamo rakkijaha.

Iani bidingo bang·a sing·na nangani aro ku·rang on·na nangani ong·enga, indake tribal candidate-rangna a·kanggimin kamrangko Schedule Tribe ong·gijagipa gipin jatrang maikai man·na kraa, tribal manderangni kamko gipin jatrangna on·na man·ja, ine GSU Western Zone-ni President Megadeth M.Marak parakataha.

Uni gimin mikkangchi namedake sandichengna nanga aro Meghalaya a·doko songdonggipa tribal candidate-rangko seokna nanga, ine GSU dabiangaha.

A·dokni dongimin Reservation Policy-o pangchake, darangkoba mikkang nigija kamna kragipa manderangko basee kamko on·na nangchongmota. “Uni gimin ta·rake iani bidingo sandianirangko dakchina chinga dabienga. Je candidate-rangkon kamo rakkiahachim, uamangko den·galpile, darangkoba mikkang nitgija kamna kragipa candidate-rangko seokchina chinga didiatenga aro ia obostani bidingo nipiltaianiko dake, karek ka·na nangchongmota” ine GSU Western Zone dabiangaha.