Gasuapara, May 31,2025: South Garo Hills a·jani Gasuapara sepang jolo donggipa Kondok songni National Highway (NH)-62 ramao Gungre songni Nokma Pa Ethinat G.Marak-ko da·al May 31 tarikni pring 8:30 bajimango buringni ka·namgijagipa mongma kal·ake ba doke siataha.
Koborna u·iatani gitade, Ethinat Marak, hostel-o dongenggipa an·tangni demechikko rimna gita re·angengachim, indiba rasong gribee ramao mongma timsoe ka·saninggija doke siataha.
Bang·a changon, indake mongmarangchi kal·ake siatanirangko man·genchimoba, Wildlife Department-ni gita Gasuapara jolo mamingba noljokatani kamrangko ka·jani a·sel, songdonggipa manderang aro songregipa manderang mongmarangni kal·ake siatako aro saknaako man·enga.
Indakgipa neng·nikanirangko man·engani gimin batanggipa, 2023 bilsion GSU Gasuapara Regional Unit, a·dokni Skotong Minister Pa Conrad K. Sangma-ko gronge, Gasuapara-o Wildlife Beat House ba Camp-ko ta·rake songchina aro Wildlife Department-ni chel·chakgipa dolrangko donkamchina gita memorandum-rangko on·ahachim, ine songni manderang parakataha.
Songni manderangni parakatani gitade, ia dabiani bidingo a·dok sorkari da·alona kingkingba maming ja·ku de·aniko dakkuja aro aganchakaniko on·kuja.
Da·alo indake, songdonggipa manderangni janggirangko gimataniara, chu·gimikan Wildlife Department aro a·dok sorkarini simsakjani a·sel ong·aha ine ma·sina gita man·aha.
Uni gimin sianggipa nokdangni jikgipana a·dok sorkari, uamangni dabia gita compensation-ko on·na nanga aro uamangni dabia gita tangka paisarangko on·na man·jaode, sianggipa mandeni jikgipana sorkarini je kamkoba on·skachina, nokdangni manderang dabiangaha.
Ia neng·nikanirangko a·dok sorkari knachakgija donggenchimode, Gasuapara jolo songdonggipa manderang aro NGO-rang apsan ku·monge, jingjengatanirangko dakanggen aro dal·bata dabianirangko dakangskagen ine songni manderang suk ong·gijaniko parakataha.
