Nongalbibra, Oct 3,2024: Nongalbibra jolni nangrimgimin NGO-rang jekai GSU, FKJGP, AOSW, GSMC, AYWO, FAF, NBHMC aro songni nokni manderang apsan ku·monge, October 2 tariko chong·motan Mahatma Gandhi-ni atchiani salko gisik ra·e Nongalbibra bajarko Cleaning Drive ba rongtalataniko dakangaha.
An·chingni samtangtango donggipa bajar antirang, rama sorokrang, nok-jam aro noksam nokgilrangko rongtale rakkianiara, an·chingni be·en bimangko an·seng baljoke rakkia aro namgipa balwarangko man·a. Uni gimin, hai an·ching mikkangchiba an·tangtangni nok jam, noksam nokgilrangkosan rongtale rakkiaigija, bajar antirang aro rama sorokrangkoba rongtale rakkiangna ine NGO-rang ku·mongdilangaha.
Rongtale dongani gimin, talatgenchimode, rongtal an·talaniara, ‘Isol-oni Sepang Ong·a’, aro iakon ‘Cleanliness is Next to Godliness’ ine agana. Baditana rongtale dongna ua gitan pilak saa ding·anirangoni an·senge rakkia.
Uni gimin, sakantian jabolrangko skatang rama sorokrango aro noksam nokgilrango galramramgija chimongenba soe galchina NGO-rang didiangaha.
