Resubelpara, May 7,2025: A·chik Holistic Awakening Movement (AHAM) Adokgre Regional Unit-ni dilgiparang, Adokgre Higher Secondary Skul-ko ta·raken Morning, Day aro Evening Shift-rangko baridapatchina a·dok sorkario dabiangaha.

AHAM A·dokgre Regional Unit-ni dilgiparang a·dokni Skotong Minister Conrad K Sangma-ko gronge, una seatgipa chittio janapatani gitade, da·o Class XI-o admission ra·na gita sak 120 chatro chatrirang dargastoko galgiparangoni sak 50 chatro chatrirangkosan admission-na seokaha, bangki sak 70 mangde watchanggalako man·aha. Class XI-o admission ra·na dorgasto galgipa chatro chatrirang bang·batan kangal nokdangonisa ong·ani gimin, admission ra·pana man·jaode, skie ra·anio ja·manchalrikgnok aro chatro chatrirang poraigija indin somoiko re·attaignok. Mitamrang ong·gija ramako re·ange, pekgipa ringa cha·anirangko jakkakna kenchakani gnang, ine AHAM Adokgre Regional Unit-ni President Marchborn R. Marak parakataha.

Indakgipa neng·nikaniko namatna gita, class-rangko bak dake ra·na man·na gita Morning, Day aro Evening shifts-ko ta·raken on·dapchina, class room-rangko rikdapchina aro kamna kragipa skigiparangko kamo rakidapchina Marak mol·molataha.

Jedakode jolni chadamberang darangba watchangako man·gija skie ra·na gita cholko man·pagen. A·dok sorkari skie ra·anikon skanggipa mikkango done kamko ka·gen ine ku·rachakgimin kattarang dongani gimin, jolni chadamberangna namgipa skie ra·ani cholrangko on·gen ine ka·dongsoeaniko AHAM Adokgre Regional Unit-ni President parakataha.