Williamnagar, Nov 20, 2026: National Highway (NH-127B)-ni Darugre Songsak gita Williamnagar ramako tarie, a·arangko cho·e jabolrangko gale, Do·be Dare-ko nosto ka·enga, ine East Garo Hills a·jani Songsak (Wagopgre) A·kingni Nokma Ma Habila Sangma, National Highways & Infrastructure Development Corporation Limited (NHIDCL)-ni Contractor M/S Sivalaya Construction Company Pvt. Ltd-ni kosako, Meghalaya State Pollution Control Board (MSPCB)-na badi ka·doangaha.
Iani bidingo MSPCB-ni Member Secretary-na lekka seate badi ka·doangengon, ia ramako tarina gita, A·king Nokmao sing·chenggija, a·brirangko cho·enga aro ro·ongrangko bikotenga. Ia a·brirangko cho·engani a·sel a·arang aro jabolrang, Do·be Dare-ona jokange, chiko nosto ka·enga ine Nokma matnangataha.
Ia ramako tarianio, a·brirangko cho·anichi aro dal·dalgipa garirangni re·ruraanichi, sambao donggipa manderangna aro samtangtango ong·telaigiparangna nangchakeaniko ra·baenga ineba A·king Nokma badi ka·doangaha.
Skango ia ramako tariani gimin janapatengon, 2018 bilsio NH-44E ramako tarimitingode, samtangtango ong·telaigiparangko chel·chakna, chidare niwatgipa a·brirangko cho·jaha ine Nokma parakataha.
Ia ramako tarienggipa contractor, a·brirangko cho·na gita nangchongmotgipa permit-rang, jekai ‘Consent to Establish’ aro ‘Consent to Operate’-ko ra·ama ra·ja, am·sandichina A·king Nokma, MSPCB-ko didiataha.
Ia ramako tarianio, samtangtango ong·telaigiparangko naljoke rakkina, pilak nanga ja·kurangko de·china didiatenba, ia kamko ka·enggipa company-ni kosako, Water (Prevention and Control of Pollution) Act, Air (Prevention and Control of Pollution) Act aro Noise Pollution Act-ni dingtang dingtang niamrango pangchake rakgipa ja·kurangko de·china A·king Nokma, MSPCB-ko didiataha.

