New Delhi, May 15,2025: Bristibar salo Indian sipairang gnigipa changna Jammu aro Kashmir a·dokni Pulwama a·jao donggipa Tral jolni Nadir minggipa songo bobil dolrang baksa gogrikanio Jaist-e-Mohammed (JeM) bobil dolni sakgittam manderang gnigipa changna so·otako man·taiaha.

Indake gnigipa changna konta 48-ni gisepo bobil dolrangko so·otaha. Indian sipairang bobil dolrang baksa Monggolbar salo skanggipa gogrikani ong·aha aro sakgittam Lashkar-e-Taiba bobil dolni manderang Shopian minggipa biapo so·otako man·aha. Sipairang gogrikgipa biaponiko bobil dolrangni jakkalgipa AK 47 silairang, gulirang aro gipin silchi darerangko man·aha.

India aro Pakistan a·song damgnini gisepo gogrikanirangko dontongna songgigrikaniko dake chandal mittugrikahaoba, da·ona kingkingba gogrikanirang bon·chipkuja aro gogrikanirang bang·batririkenga.

So·ota man·gipa sakgittam bobil dolrangara Asif Ahmed Sheikh, Amir Nazir Wani aro Yawar Ahmad Bhat ong·achim aro uamang gimikan Jammu aro Kashmir-ni Pulwama a·jao songdonggiparang ong·a, ine ma·sina gita man·aha.

Indian sipairang ning·joljol kobor man·soe, Awantipora-ni Special Operations Group (SoG) aro Indian Army baksa nangrime, operation-ko ka·aha. Operation-ni somoio bobil dolrang sipairangko gochengaha, indake dolgnini gisepo bilongbee gogrikani ong·aha. Indian sipairang manderangni napram ramako champengate, ong·katram ramao dongtime manderangko jokataha. Indakmitting somoio Indian sipairang chanchipgipa bobil dolrangni re·ruraaniko kobor man·soae, Reasi a·jani Bhaga jolo operation-ko a·bachengataha.