New Delhi, May 10,2025: India a·songni sima arirangona, Pakistan Army-rangni watatgipa drone-rangko aro gipin silchidarerangchi goatgiparangko Indiani sipairang champengsona man·aha.

May 7 aro 8 tarikrango Pakistan sipairang Indiani sima ari batpile, changni chang watatgipa uamangni drone-rangko ge 300 ba 400 mang ong·pile, Indiani dam 36 dingtang dingtang sima arini biapangona watataha ine MEA-ni Colonel Sofiya Qureshi aganaha.

“Uamangni watatgipa drone-rang, Indiani Defence System-rangko chekna aro India maiko dakenga uarangko sriksrik u·ina miksonge watataha. Indiba uarangko chinga nosto ka·e galna man·aha. Uamangni mitam drone-rang jekai Asisguard Songar minggiparangde, Turkey a·songo tarigipa drone-rang ong·a” ine Sofiya aganaha.

May 8 aro 9 tarikrangoba Pakistan adita drone-rangko Jamu aro Kashmir-ona watatenba, Bathinda Military Camp-ko chadrapna jotton ka·ahachim, indiba uarangko India nisie galna man·aha, ine Wing Commander Vyomika Singh aganaha.