Williamnagar, Feb 14, 2025: Garo Hills-o tom·tomani ong·engon, gitcham Garo National Liberation Army (GNLA) bobil dolko bikottaina jotton ka·enga ine Social Media-rango jangbingbangataniko mijal Bristibar salo a·dokni PHE Minister aro Williamnagar elakkani MLA Marcuise N.Marak, jegalatenba, da·ororo Meghalaya a·dokni pilak biaprangon tom·tomani aro namroro silroroanirangko nikna man·engahani gimin, bobil dake chakatgipa dolrangko bilakatani chol dongjaha ine parakataha.

A·dok sorkarini namroro silroroanina kamrangko ka·anichi aro chadamberangna dingtang dingtang janggi tangani cholrangko dake on·anichi, chadamberang ong·gija ramarangchi re·anganiko champengna man·engaha ine Marak parakataha.

Batanggipa somoirango Garo Hills-o bang·a bobil dake chakatgipa dolrangni bilake kam ka·anirangko niatpilgengon, skangode Williamnagar jolrangoba bobil dake chakatgipa dolrang bilakani gimin chadamberang ong·gija ramarangona dilsretangako man·rongachim, indiba ia chasongni chadamberang namen skia man·aha aro sorkarini on·enggipa dingtang dingtang cholrangchi janggi tangna cholrangko man·engahani gimin, ong·gija ramarangona dilsretangko man·jaha ine Williamnagar-ni MLA parakataha.

Da·alo bang·bata chadamberangan, skia man·giparang ong·tokaha aro sorkarini gita chadamberangna CM Elevate, Meghalaya State Rural Livelihood Society (MSRLS) program-rang, Focus, Focus plus aro dingtang dingtang program-rangko ong·ate, chadamberangna cholko on·aha ineba Marak janapataha.

Unbaksana, District Administration aro BDO-rang dingtang dingtang awareness program-rangko ong·atanichi, da·alo chadamberang Pulisni kamna krenge jotton ka·enga aro pringanti ranta ka·anirangko dakenga ine a·dokni Cabinet Minister aganaha.

Una agreba chadamberangna dingtang dingtang porikkarangko sena gita skie on·enga. Da·ororo bang·bata chadamberangan MCS aro MPS officer-rang ong·na krenge porikkarangko setokenga aro chu·sokgiparang ong·e kamrangko ka·tokenga ineba Marak parakataha.

Gitcham GNLA bobil dolni member-ranga sorkari dakchakanirangko on·anichi bang·bata chadamberangan, namgipa kamrangko ka·e songsalo janggi tangtokengaha ine Marak a·kangataha.