Chokpot, May 9, 2025: Nokrek Area Development Committee (NADC) aro GSU Asugre Regional Unit, Bristibar salo, South Garo HIlls a·jani Deputy Commissioner-ko gronge, dingtang dingtang nanganirangna, uni jak gita a·dokni Education Minister Rakkam A.Sangma aro Power Minister AT Mondal-na lekka sedoataha.

NGO-rangni Education Minister-na sedoatgipa chittio janapatani gitade, Chokpot Constituency-ni ning·o donggipa, Rongdi Anchenggre songo donggipa Durama Wagegitok RMSA Secondary Skulo song dam 20-ni chatro chatrirang skie ra·enga aro ia jolo Durama Wagegitok RMSA Secondary Skul ge·sasan dongaia, gipin Secondary Skulrang dongja ine parakataha.

Ia Skulko 2019 bilsio kuliaha aro ia Skulo sak 18-na baten class IX aro class X-o poraigipa chatro chatrirang donga. Indiba rasong gribee, ia Skulo Mathematics, Science aro English skigiparang gri bilsi 5-na ia skulko chalaiaha. Indaken, chatro chatrirang skigipa gri an·tangtang jotton ka·e, darangba dakchakani gri SSLC porikkako seaha aro ia bilsio sakgni chatro chatrirang SSLC porikkako pass ka·aha, ineba NGO-rang parakataha.

Uni gimin, chatro chatrirangni namgnina aro poraiani gadangko tang·doatna ta·raken ia Durama Wagegitok RMSA Secondary Skulo Mathematics, Science aro English skigiparangko rakkie on·pachina NGO-rang Education Minister-ko didiataha.

Unbaksana, Bandarigre RMSA Higher Secondary Skulo Philosophy aro Geography gital subject-rangko ra·gate on·china aro ia subject ge·gnina skigiparangko rakkie on·china, gitaba NGO-rang dabiangaha.

Bandarigre RMSA Hr. Secondary Skulo Philosophy aro Geography subject-rangko poraina nangnikgipa chatro chatrirang bang·en gnang, indiba ia subject-rang dongjani a·selo chatro chatrirangna neng·nikani ong·enga ine janapatenba, ia gital subject-rangko ra·gate, on·china gitaba NGO-rang Education Minister-ko didiataha.

Indake ong·engon, a·jao poraiani gadangko tang·doatna aro chatro chatrirangni namnikgipa subject-rangko poraina gita cholko on·china, Education Minister-ko mol·molataha.

Una agreba, South Garo Hills a·jani Chokpot Civil Sub Division-ni ning·o ga·akgipa Mekalpagre songo, Meghalaya a·dokko man·chengaoni da·o bilsi 50 batangpiloba, bijoli gri andal mindik dongna nangenga, ine janapatenba, songo bijoli line-rangko sokate ba sringe on·pachina, a·dokni Power Minister AT Mondal-ko NGO-rang mol·molataha.

Mekalpagre songni manderang bijoli dongjae, mombati aro kerosin-ni lemkosa jakkalenga. Mongsongbate, poraienggipa chatro chatrirang da·oni chasongo skie ra·anio aro mobile jakkalnio bijoliko nangchongmota. Uni gimin, man·adipet ta·rakale Mekalpagre songo bijoli line-rangko sringe bijoliko ching·atpachina NGO-rang dabiangaha.

Ia songara Chokpot constituency ning·o ning·tubatgipa song ong·a. Ia ning·tugipa songko politician-rang aro official-rang dingtangmancha pilakni gitan watchanggala ine NGO-rang matnangataha.

Ia songko dilgiparangni watchanggalaniara, Indian Constitution-ni Fundamental Rights-ko jegalan baksa Directive Principles of State Policy-ni niamko pe·ani ong·a, ine janapatenba, Mekalpagre songo bijoliko on·chongmotna nanga ine NGO-rang dabiangaha.

Uni gimin, iani bidingo bil gnanggipa authority-rang aro Power Minister, ta·rake nirokataniko dakenba, ia watchanggalenggipa songo bijoli line-rangko sokate aro ching·ate on·pachina NGO-rang Power Minister-ko mol·molataha.