Tura, May 23, 2025: Federation for A·chik Freedom (FAF) Chief Committee, Tura Meghalaya Board of Skul Education (MBOSE)-ni ia bilsini Matric porikkako December jao ong·atna somoi tik ka·aniko jegalatenba, bilsianti ong·atronga gita matric porikkako ra·china MBOSE-ni Authority-rangko aro a·dok sorkariko didiataha.
Ia bilsini Matric porikkako December jao ra·genchimode, MBOSE-ni staff-rang aro authority-rangna dal·a neng·nikani ong·gen aro porikkana nanga gita tarisamsona somoi man·srapjawa ine FAF Chief Committee-ni President Brinbal M.Sangma parakataha.
Matric porikkana question paper-rangko tarisona, logistics aro administrative arrangement-rangko tarina gita somoi man·srapjawa, kamrang bang·batgen aro poraienggipa chatro chatrirangba porikkana tarisoanio neng·nikaniko chagronggen, ine parakataha.
Uni gimin, “Ia chanchianiko nipiltaie, December jao ong·atna sienggipa Matric porikkako dontongatpile, skangoni ong·baenga gitan Matric porikkako somoi gita ra·china aro namedake porikkao ong·atchina, chinga sorkariko aro MBOSE-ni authority-rangko raken didiatenga” ine Sangma u·iataha.
Matric porikkako December jao ong·atgija, ong·atrongenggipa somoiko dingtangatgija ong·atna nanga, chatro chatrirangna chu·onga gita Matric porikkana tarisona somoiko on·na nanga aro Matric porikkako ong·atanio maming neng·nikani gri ong·atchina, FAF dabiangaha.
“Maibakae tarisoanirang ba arrangement-rang namjae, chatro chatrirang mikkangchi maiba a·sel ong·na nangode, chinga nie dongjawa. Sorkari iani bidingo ta·rake ja·kurangko de·enba, December jao ong·atenggipa Matric porikkako ong·atronga somoi gitan matric porikkako ra·china” FAF bilaken dabiangaha.
