Tura, May 9,2025: Tura-o rikenggipa Tura Medical College-ko Skotong Minister Conrad K Sangma, adita salrangna skang niangani ja·man, Skotong Minister-ni agangipa kattarangko Trinamool Congress (TMC) raken jegalataha.

Skotong Minister-ni aganani gitade, ia project-ni kamrang da·o 80 percent matchotaha, indiba ia Medical College-ko mikkang bilsioni a·bachengatna, kamrangko ia 2025 bilsini December jao matchotgen ine rongtalbregija agananiara manderangni gisiko jajaatani ong·enga. Ia sal somoirango sanna bananirangko ra·anio manderang bang·en korosrang ong·enga aro chel·a biaprangchi re·ange sanna bananiko dakna nangengon, Skotong Minister-ni indake rongtalbregija agananiara, manderangna suk ong·gijaniko ra·baanisan ong·aia. Kamrangko ka·anio ru·ute dongna nangja” ine TMC-ni dilgipa Richard M. Marak parakataha.

Garo Hills-o Tura Government Medical College-ko kuliani niksongara manderangna namgipa sanna bananirangko on·anisan ong·aigija, Indiba ia Medical-ko poraina nangnikenggipa chadamberangna namgipa chol ong·genchim. “Ian Meghalaya a·doko skanggipa sorkari Medical College ong·ani gimin, kamrangko ja·manchake dongna mangjaha. Ia Medical College-ni Academic Session-ko jedakeba 2026 bilsiode a·bachengtelna nangengjok. Somoirangko ra·dodaproroaniara manderangni sanna bananirangko ra·anio neng·nikanirangko ra·baani ong·enga” ineba Marak parakataha.

Ia Tura Medical College-ko chalaina gita Private Company-rang baksa agangrikenga ine Skotong Minister-ni agananiko, TMC dilgipa raken jegalataha aro ia Medical College-ko Private Company-rangchi chalaina on·gija sorkarian chalaichina didiataha.

Ia Medical College-ko sorkarichi chalaigen ineasa manderangna ku·rachakaha, ine janapatenba, “Ia Medical College-ko Private Company-chi chalaigenchimode, poraienggipa chatro chatrirangna aro sanna bananirangko ra·enggipa manderangna korosrang bang·bate nangani gimin neng·nikani ong·gen”, ineba Marak parakataha.