Tura, Sept 11, 2024: Tura Civil Hospital-o kam ka·giparang chu·ongjaengani a·sel sanna bananirangko on·anio neng·nikanirangko man·enga, ine A·chik Conscious Holistically Integrated Krima (ACHIK) parakatenba, Tura Civil Hospital-na chu·onga gita kam ka·giparangko rakkiatchina a·dokni Health Minister-ko didiataha.

Tura Civil Hospital-na Anaesthetist-ko donatchina didiatenba, Civil hospital-o Anaesthetist-rang chu·ongjani a·sel, Surgery ka·na nangenggipa manderang ru·uta somoirangna senge dongna nangenga aro mitamrang chel·a biaprangchisa re·ange surgery ka·na nangenga ine ACHIK Krima Council-ni dilgiparang parakatenba, Tura Civil Hospital-o chu·onga gita Anaesthetist-rangko donatchina a·dokni Health Minister-ko didiataha.

Medical Laboratory Technician aro Technologist-rangko songani bidingo janapatengon, “Tura Civil Hospital-o A·chik ong·gijagipa laboratory technician aro technologist-rangko ra·na chanchianirangko chinga kobor man·soaha. Chinga dingtang dingtang jatni medical professional-rangko mande ra·ja ong·ja, indiba Garo Hills-o iandakgipa kamrangna jattangko ba joltangni manderangko ra·na man·ode, nambata maina A·chikrangsa songtangni daka rikani aro ku·agananirangkode nambate ma·sia. Jattangni ba joltangni manderangko kamo ra·genchimode, sagiparang baksa agangrikanirango neng·nikanirangko man·jawa. Jedakode, joltangni manderangna kam ka·e cha·na cholko man·gen” ine ACHIK Krima Council-ni dilgiparang parakataha.