Resubelpara, Sept 11, 2024:Da·ororo chadamberangni an·tangtangko so·ote sianirang batroroengahani gimin, indake an·tangtangko so·ote sianirangko champengna gita, a·gilsak gimikon, ‘World Suicide Prevention Day’-ko manitokengon, Garo Hills-ni dingtang dingtang biaprangoba, World Suicide Prevention Day-ko maniangaha.
Ia World Suicide Prevention Day-ko maniani bak gita, Monggolbar salo North Garo Hills a·jani District Mental Health Program (DMHP)-ko Resubelpara RMSA Secondary Skulo ong·atangaha.
Ia program-ko ong·atani miksongara, North Garo Hills a·jaoba, chadamberangni an·tangtangko so·ote sianirangko champengna aro suicide ka·ani nama aro namgijani gimin agantalate mikkrakataniko on·na ia mongsonggipa ‘mental health awareness’-ko manderangni dakchakachi suicide ka·anirangko champengna program-ko ong·atangaha.
District Nodal Officer, Dr.Rezina Sangma, DMHP-ni gimin agantalatenba, an·tangtangko so·ote sianirangko champengna gita raken ja·ku de·aniko a·bachengatna aro agan golpogrikaniko dakna, “Changing the Narrative on Suicide” with the call to action “Start the Conversation” ine theam-ko ba miksongani topic-ko done, program-ko ong·atangaha.
Je manderangan, mental health-ni gimin dakchakna sikenba kamko ka·engachim, uamang chadamberangna ka·dongataniko agan ku·pattie on·enba, so·ote sianirangko komiatna aro dakchakaniko on·an baksa suicide ka·anirangko champengna dingtangmancha miksonge program-ko ong·ataha.
Unbaksana suicide ka·ani bidingo agan ku·pattie, mikkrakataniko on·enba, ka·dongataniko aro dakchakaniko on·na nanga ine Dr. Sangma aganangaha.
DMHP mai kamrangko ka·enga, iani bisingo talatangengon, ia gisikni gita tik ong·gijagipa manderangna dakchakaniko on·na gita raken kam ka·enga, uni gimin suicide ka·anirangko champengna sakantian kamrangko ka·china didiangaha aro DMHP-ni gita tangka paisa nanganirangko dakchakgen ineba Dr Sangma agandapangaha.
Uandake, World Suicide Prevention Day-ko maniani bak gita Resubelpara ‘A·we Pedallers Club’, suicide ka·aniko ba an·tangtangko so·ote sianirangko champengna awareness-ko ong·ate, cycle salsusaanio bakko ra·angtokaha.
