@ghnews.in@

TURA, FEB 7, 2026: West Garo Hills a·jani Gambegre C&RD
Block-ni Norang Chisamo donggipa Rajingpara songo batanggipa, 2023 bilsio Japan International Cooperation Agency (JICA) Project-ni gita Community Hall-ko rikahachim. Indiba ia Community Hall-ko do·ga tekgija, glassrangko tekgija donchipenba kamrangko matchotgija galchipe donenga ine Sairill D Marak u·iataha.

Ia Community Hall-ko Dalu Chaipani-o donggipa Contractor Depok Saha kamrangko ka·ahachim. Indiba, ia Community Hall-ko rikna gita songni manderang an·cheng olate, Depok Saha da·onaba tangkarangko on·kuja ineba parakataha.

Indake ong·engon, ia Community hall-ni mikkango ba sambao inauguration ka·ani signboard-ko mija re·anggipa, 2025 bilsini December jao songni manderangna u·iatgija songe donangaha ine Marak parakataha.

Songni manderangni aganani gitade, re·anggipa 2025 bilsio Skotong Minister-ba, darang Minister-ba aro MLA-ba, Rajingpara songko ga·tapean dongja ong·ode, ia community hall-ko 2025 bilsini June 17 tariko sawa inauguration ka·eha aro signboard songeha, ine sing·doatenba,ian donnue dakani kam ong·a ine ua parakataha.

Ian department-ni manderangna ka·donganiko aro bebe ra·na man·gijako mesokani ong·a. Iandake, songni nokni manderangna on·atgipa development-ni kamrangko cha·minokgipa aro togigipa contractor, Depok Saha-ni licence-ko den·galna aro black list-o donna nanga ine songni manderang dabiangtokaha.

Uasan ong·aigija, Depok Saha-ni katketgijagipa kamko aro u·igijagipa sorkari offical-rangni kamko a·dok sorkari ta·raken kamoniko ra·galna nanga, ine dabiangenba, iandakgipa kamrangko nie dongjawa, am·sandie, rakgipa ja·kurangko de·anggen ine Sairill Marak parakataha.