@ghdnews.in@

Tura, February 3, 2026: Rimpu Bagan (RB) case-o rim·a man·gipa manderangoni badi ka·gipa sak 15 manderangna gong 50,000-ko dai gamchina Meghalaya Human Rights Commission (MHRC)-ni ge·etaniko on·atani ja·man, da·o ia manderangni biming aro biapko jinmani nikrangrao internet gita see parakahani gimin ia manderang, an·tangtangni suk ong·gijaniko parakattokaha.

Re·anggipa 2022 bilsini July 22 tariko, Tura Edenbari-o donggipa Rimpu Bagan (RB)-ko pulisrangni chadrapanio, mandena on·gimin bilko pe·ahani gimin badi ka·dogipa manderangoni sak 15-na dai gamchina Meghalaya Human Rights Commission (MHRC), ge·etaniko on·aha.

MHRC-ni u·iatani gitade, RB-ko pulisrangni chadrape rim·gipa manderangni ming 30 case-rangko MHRC segataha, indiba ia ming 30 case-rangoni ming 15-kode badi ka·gipa manderang an·tangtangan ra·pilaha.

Indake, badi ka·gipa sak 15 manderangna sakprako gong 50,000-ko dai gamchina ge·etanio, ia sak 15 manderangni biming aro address-rangko social mediarango ba internet-o see parakahani gimin uamang suk ong·gijaniko parakattokaha.

“Maming pangchakani gri rim·ako man·e, indita somoirangna gisikni gita neng·skimaniko man·ani ja·man, da·o chingni biming aro address-rangko jinmani nikrangrao parakaniara chingna kenani aro dongtogijaniko ra·bapiltaiani ong·aha aro ia lekkako social media-rango watrikrikaniara chingna aro chingni nokdangrangna ra·chakna man·gijani aro kenchakna nanganiba ong·enga” ine uamang parakataha.

Ia bimingrangko social media-rango watrikrikjachina aro kimite galchina gitaba uamang, social media jakkalenggipa manderang sakantikon didiataha.

“Chingni biming aro address-rangko iandake social media-rangko watrikrikangkua ong·ode, chinga an·tangtangna on·gimin bilo pangchake, nanga gita ja·kurangko de·na draatako man·gen. Uni gimin Rimpu Bagan case-o badi ka·giparangni namgnina aro naljokgnina sakantikon chanchininge kamko ka·pachina mol·molatenga,” ine uamang parakataha.