@ghdnews.in@

Baghmara, February 1, 2026: South Garo Hills a·jani Dawaguri minggipa songoni bilsi 24 ong·gipa Kewan A.Sangma Chennai songjinmao gimaenga ine koborko man·soaha.

Koborni gitade, Chennai-o contractor kam ka·gipa Sukuru Sutradhar minggipa mande saksa Chennai-o kam donga ine okamatenba, January 18 tariko train ticket-na tangka gong hajal 3000-ko advance Kewan A Sangma-na GP ka·ataha.

Indake, Kewan Sangma, an·tangni ripengrang baksa January 19 tariko songtangoni Chennai-ona re·angaha aro January 21 tariko sokeaha. Jensalso Kewan aro uni ripengrang Chennai-ona sokeahaon, kamde saksanasan dongaia ine Sukuru Sutradhar agane, January 21 walon Kewan-ko Chennai-oni Tamilnadu-ona rimangaha. Kewan-ni ripengrang Chennai-o dongrike gipin kamo join ka·aha.

Indake ong·engon, Kewan Sangma-de chingo dongja ine January 22 tarik walon Sukuru Sutradhar nokdangni manderangna koborko on·ataha. Indiba Kewan Sangma-ni mobile, Aadhaar card, ba·ra chola aro bag-de Sutradhar-ni jakon donga ine u·iataha.

Kewan Sangma-ko okamatgipa Sukuru Sutradhar-ko sandie, sing·sandianiko dakpachina nokdangni manderang pulisrangko aro NGO-rangko mol·molataha.