Tura, Sept 23, 2025: North Eastern Hills University (NEHU) Tura Campus-ni Post Graduate Students Union (PGSU)-ni dilgiparang, adita salrangna skang a·dokni Governor CH Vijayashankar ko grongenba, NEHU Tura Campus-o neng·nikanirangko see parakangaha.

PGSU-ni dilgiparang a·dokni Governor-ko grongeanio NEHU Tura Campus-o
chagrongenggipa neng nikanirangko janapenba, iandakgipa neng·nikanirangko namatchina didiangaha.

“NEHU Tura Campus-o poraienggipa chatro chatrirang, an·tangtangni man·na nanganirangko man·tokjaengani gimin ian University-ni neng·nikanisan ong·aija, indiba mandeni man·na nanganiko champengani gita ong·enga. Tura Campus-o poraienggipa bang·a chatro chatrirang iandakgipa neng·nikanirangko nie dongna man·jawa” ine PGSU parakangaha.

PGSU-ni parakatani gitade, NEHU Tura Campus-na tangka paisa dakchakanirangko on·jagenchimode aro University-ko chalanirangko namdapatja ong·ode, ia University-ni miksongani aro mingnamani gimanaba donga.

“la Campus-o ong·enggipa obostarangni a·sel chatro chatrirang, ma·a paarang aro kam ka·giparang kadongani gri ong·tokengaha aro iandakgipa neng·nikanirangko ta·raken namatjagenchimode, Garo Hills-o chubata gadango poraiani cholrang namchipjawa” ine PGSU parakataha.

PGSU-ni Governor-na seatgipa chittio janapatani gitade, NEHU Tura Campus-o dambonga department-rang class-room gri chalaienga, ringani chirang dongja, hostel-rangba chu·ongja, laboratory-rangba dongja, chatro chatrirangko salruragipa bus garirangba dongja aro staff quarter-rangosa chatro chatrirang dongchakna nangenga.

Una agreba, NEHU Tura Campus-na tangka paisa dakchakanirang dongjani a·sel, campus-ko chalaianirango kamrang namjani a·sel chatro chatrirangsan ong·aigija, kam ka·giparangba neng·nikanirangko man·tokenga ine PGSU parakataha.