Shillong, Sept 22, 2025: Re·anggipa antio NPP-chi dilenggipa MDA 2.0 sorkarini Cabinet-ko sualpiltaianio Cabinet-ni saksakamkam me·chik Minister Ampareen Lyngdoh-ko ra·galanina Hynniewtrep Integrated Territorial Organisation (HITO), suk ong·gijaniko parakatenba, a·dokni Skotong Minister Conrad K Sangma-ko kam watenba, an·tangni biapko Khasi ba Jaintia dilgipana on·skachina didiataha.

Iani bidingo a·dokni Skotong Minister Conrad K Sangma-na sedoatengon, an·tangni biapko kamni gimin ma·sigipa aro changgipa Deputy CM Sniawbhalang Dhar, Prestone Tynsong aro UDP-ni President Metbah Lyngdoh-na on·skana man·gen ine HITO-ni President Donbok Dkhar parakataha.

“Skotong Minister-ni biapko ia dilgiparangoni saksana wate on·anichi, pilak kamrangon apsan ong·na nanga aro nang·ni aganronganiko kamchi mesokani ong·an baksana nang·ni pagipa PA Sangma sagini ja·ku de·aniko mesokaniba ong·gen,” ine Dkhar, seachi parakataha.

HITO President-ni parakatani gitade, 1998 bilsio Meghalaya a·dokni saksa dilgipa Purno Agitok Sangma sagiba a·dokni gitcham Skotong Minister BB Lyngdoh baksa 50:50 dake bilko sualgrikna songgigrikahachim. Uamangni iandake bilko sualgrikna tik ka·aniara Meghalaya-ni Politics-ko tarianio niksamsoaniko aro pilakon apsan ong·aniko mesokani ong·a, ineba Dkhar parakataha.

Bilsibongani bijangchio Cabinet-ni biaprangko sualpiltaiani bidingo janapatengon, Cabinet-ni saksakamkam me·chik Minister Ampareen Lyngdoh-ko ra·galaniara, Cabinet-o me·chikrangni dongpaaniko namnikjae ra·galani gita ong·aha ine Dkhar parakataha.

“Meghalaya a·dok gita dakgipa me·chikrangni songsalo me·chik Minister-rangni Cabinet-o donggijaniara kraani ong·ama? Cabinet-ni biaprangko sualgrike on·na man·a ong·ode, Skotong Minister-ni biapkoba sualgrikna man·na nanga” ine HITO-ni President parakataha.

Cabinet-ko gital dake sualpiltaianio Minister sak 8-ko bodolenga ong·ode, Skotong Minister-ni biapkoba sualgrike ra·na nanga ine ua parakataha.

Cabinet-ni dal·batsranggipa biaprang, chong·motan Skotong Minister, Opposition dolni dilgipa, Assembly-ni Speaker aro Deputy Speaker-ni kamko da·o dipet A·chikrangsa jako ra·enga ineba HITO-ni President parakataha.

“Ian uamangni bilko mesokani ong·enga, indiba apsan somoion Khasi aro Jaintia Hills a·jani dilgiparangnaba cholko on·na nangchongmota. Term-ni gnigipa bako Skotong Minister-ni biapko Khasi-Jaintia dilgiparangna on·skana nanga” ine HITO-ni President dabiangaha.