@ghdnews.in@

Tura, January 11, 2026: West Garo Hills a·jao donggipa Wadagokgre songni Nokmana mamingkoba u·iatgija rorirang niamgri sriksrik ro·ong bikotengani gimin, songni Nokma uamangko changni chang dontongchina aganahachim, indiba uamang manigija ro·ong bikote bading chiwalenga, ine songni manderang kobor on·atani gimin, A·chik Conscious Holistically Integrated Krima (ACHIK) Rajabala Regional Unit-ni dilgiparang January 8 tariko niamgri ro·ong bikotenggipa rorirangko okamate, ro·ong bikotaniko dontongchina raken beng·e donbaaha.

Uandake salgipino, chong·motan January 9 tariko, ACHIK HQ-ni Chief IT Cell aro adita sak Field Assistant-rang baksa ua apsan biapona re·ange nirokaniko dakna re·angtaienba, gipin biaponi re·bae niamgri ua jolo nok rikdrae dongenggiparangko nirokjolbaaha.

Ua biaprangko niroka matchotani ja·man, Wadagokgre songoni re·bapilmtiting somoio Bhaitbari jolni ma·sina man·gijagipa manderang jinma rama jangchio ro·ongrangko donpenge, ACHIK Organisation-ni dilgiparangko ro·ongrang, atterang, ruarang aro jompolrangchi gorurue chadrapaha, ine ACHIK dilgiparang talataha.

Uandake uamangni chadrapanio gari bol gnide sale katna gita man·aha, indiba gipin bolgni garide a·damon nosto ong·ahani gimin, mitam ACHIK dilgiparang kate chakaha. Indiba rasong gribee Dilseng M. Sangma-kode atte, rua aro jompolrangko ra·bite chadrapgipa manderang jinma dokgrime siataha, ine ACHIK dilgiparang parakataha.

Ian gnigipa changna rorirangni ACHIK dolni dilgiparangko so·otani ongengaha, ineba janapataha.

Iandake ka·saninggija so·otaniara, ACHIK dolni dilgiparangkosan so·ota ong·ja, indiba A·chik jatni dedrangkosa so·otaha. A·chik A·songni NGO Nokdangni manderangkosa so·otaha.

Uni gimin “chingni ka·sara A·chik jat aro pilak Garo Hills-ni NGO Nokdang gimikkon chinga mol·molpana nangnika, iandakgipa obostarangna jrip nie dongaigija, hai an·ching ku·cholsan ong·e ku·rang on·na, jakpong gona aro A·chik jatni ku·monganiko bilakatna” ine ACHIK dilgiparang ku·monganiko on·ataha.

Matgrik Dilseng M. Sangma-ni siani ACHIK dolnasan ong·aigija, A·chik jatnaba dal·a gimaani ong·aha. Uko so·otanio jak donggipagiparang pilakkon ta·rake sandienba rim·na nanga aro niam gita rakbatgipa sastiko on·china, ACHIK dol dabiangaha.

Matgrik Dilseng M. Sangma tom·tomao neng·takchina aro uni dongrikenggipa nokdangni manderangna Nokgipa ka·dimeaniko on·china, ACHIK dilgiparang duko ga·akgipa nokdangni manderangna kalimpaaniko parakatenba, Isolo bi·chakan baksa nama sikaniko on·ataha.