@ghdnews.in@

Tura, Jan 10, 2026:A∙chik Conscious Holistically Integrated Krima (ACHIK) Organisation dolni member saksa Dilseng M. Sangma-ko u·ina man·gijagipa manderang, West Garo Hills a·jani Rajabala Pulis Station-ni ning·o donggipa Bhaitbari, Goalgaon jolo jinma chadrape dokgrimani a·sel janggitangko gimataha.

Ia a·sel Sukrubar attamni 2 bajimango ong·aha aro a·sel ong·anio sakgni manderang bilongbee saknaako man·ahani gimin, saknaa man·giparangoni saksade janggitangko gimaataha. Indake
ka·saninggija chadrapaniko man·e singgipa Dilseng M.Sangma Phulbari jolo donggipa Amokgre songoni ong·a, ine West Garo Hills a·jani Superintendent of Pulis (SP) Abraham T. Sangma parakataha.

A·sel ong·anio saknaa man·gipa manderangko ta·raken Bhaitbari Community Health Centre (CHC)-ona ra·angaha, indiba obostarang namjabatroroahani gimin, nambata sanna bananiko on·na gita, Tura Civil Hospital-ona ra·bahachim, indiba rasong gribee hospital soksrapgijan saksade ramaon janggi galaha. Indake ong·na kragija a·sel ong·anio ma·sina man·gijagipa manderang Dilseng Sangma-ko jinma chadrape dokgrimanio jak donggipa manderangko ta·raken rim·na gita pulisrang am·sandianiko dakenga ine SP parakataha.