@ghdnews.in@

Tura, Jan 10, 2026: January 9 tarik Sukrobar salni 2 bajimango West Garo Hills a·jani Rajabala Pulis Station-ni ning·o ga·akgipa, Bhaitbari Goalgaon songo ACHIK Organisation-ni member saksa Dilseng M.Sangma-ko ka·saninggija jinma dokgrime siatahani gimin, Garo Hills-ni NGO-rang jedake Garo Students’ Union (GSU) Central Executive Committee (CEC), HQ Tura, Niksamso Garo Community Organisation (NGCO), HQ, Simsanggre aro Civil Society A·chik Welfare Organisation (CSAWO) HQ, Ampati raken jegalataha.

Ua a·sel ong·anio jak donggipa pilak manderangkon ta·rake am·sandienba rim·china aro niam gita rakgipa sastirangko on·china aro sianggipa mandena kakket bichalko ra·bachina GSU CEC-ni President Tengsak G. Momin, NGCO HQ-ni President Tengak R. Marak aro CSAWO HQ-ni President Tryans Ch.Marak raken dabiangaha.

Iandake ka·saninggija mandeni janggiko gimaataniara ra·chakna man·gijani ong·a aro chinga indakgipa kamrangko nidame dongjawa, ine NGO-rang parakatenba, dos dakgipa manderangko ta·rake rim·china aro ua manderangko siani sastirangko on·skachina dabiangaha.

Uni gisepon, District Administration aro Pulis Department dos dakgipa manderangni kosako rakgipa ja·kurangko de·jagenchimode aro ua manderangko am·sandie rim·jaode, Democracy-ni bewalo rakgipa ja·kurangko de·angskagen aro maming saloba uamang baksa compromise ka·grikani dongjawa ine NGO-rang gisiko ka·kim chae, an·tangtangni ka·tong be·aniko parakataha.