Tura, Oct 7,2024: Salgni skang Garo Hills gimiko mikka dontonggija waani a·sel a·arang be·dape, chi man·pake sianggipa nokdangrangna aro gam jinrang gimaatako man·e duko ga·akenggipa manderangna Prime Minister-ni Relief Scheme-ko on·na gita Tura-ni MDC aro BJP-ni State Vice President Bernard N.Marak ku·rachakataha.

Mikka dontonggija waanichi Garo Hills-ni bang·a dingtang dingtang biaprango a·arang be·dape, chirang bane sak 15 manderang janggitangtangko gimaatna nangaha.

Garo Hills gimikon indake ong·telaigipa obostarangko chagrongna nangahani gimin, bang·a manderang neng·nikanirangko man·tokengon, Marak an·tangni ka·a be·aniko parakatenba, duko ga·akenggipa manderangna Prime Minister-ni Relief Scheme-ko sokate on·na jotton ka·gen ine ku·rachakataha.

Garo Hills-o dontonggija mikkarang waanichi indakgipa a·selrangko chagrongna nangaha. Uandake, Garo Hills-ni bang·a songrangon, ritchani ritcha nokdangrang neng·nikanirangko chagrongna nangtokenga.

“Manderangni indakgipa duk chakanirangko nike anga namen duk ong·a aro manderangna dakchakaniko on·na sika. Bang·a songrangon, manderangni ramram rikgipa nokrangko chi man·angaha, maina bang·a nokdangrangan an·tangtangni man·na nangenggipa PMAY nokrangko man·tokjaha” ine Marak suk ong·gijaniko parakataha.

A·arang rudape, chi man·ange, nok jam gri duko ga·akenggipa manderangna District Administration dakchakaniko on·na jotton ka·enga. Indake ong·genchimoba bang·a songni ramarangkon name tarijahani a·sel, chirang pe·angaha, indakgipa kamrangko sorkari name nirok sandina nangenga ineba Marak parakataha.

“Anga saksa Tura-ni DC ong·oba, dukko man·enggipa pilakan-nade dakchakaniko on·na man·jaenga, maina angni account-rangko sorkari chipattokaha aro District Council-ni bang·bata bill-rangkon gamgija donchipenga. Angni bading chiwalanirangkoba sorkari ra·sekaha aro angni kosako bang·en mamlarangko segataha. Indakgipa neng·nikanirangko anga chagrongna nangengoba, duko ga·akenggipa manderangna angni man·a gita dakchakanirangko on·na jotton ka·gen” ine Tura-ni MDC parakataha.