@ghdnews.in@

JACMRWUTura, Dec 13, 2025: All Meghalaya Muster Roll Progressive Workers Union (AMMRPWU) aro All Jaintia Muster Roll Workers Labour Union (AJHMRLU) dolgni bakrime bikotgitgipa, Joint Action Committee Muster Roll Workers Union (JACMRWU), December 12 tariko East Garo Hills a·jani Skotong songjinmao donggipa Williamnagar Town Govt. LP Skulni kal·chakram biapo tom·bimonganiko ong·atangaha.

Ia tom·bimonganio AJHMRWLU, AMMRPWU aro JACMWU-ni dilgiparang Khasi, Jaintia aro Garo Hills-ni dilgiparang, Meghalaya a·dokni dingtang dingtang sorkari department-rango Muster Roll-ni kamko ka·giparang sak hajalsana baten bakko ra·angtokaha.

Ia tom·bimonganiko ong·ataniara, Meghalaya a·dokni dingtang dingtang sorkari department-rango Muster Roll-ni kamko ka·giparang, bang·a dingtang dingtang neng·nikanirangko chagrongna nangengani gimin, a·dok sorkarina ku·rang on·na aro Muster Roll-rangni man·na nangenggipa arrear ba VDA-ko ta·rake on·china, bilsianti Floor Rate-ko ra·gatchina, department ge·antion EPF-ko ra·gate retire ong·anggipa Muster Roll-rangna on·china, bilsi 10 gapgipa Muster Roll-rangko ta·rake RCW segatchina, Muster Roll-rangna on·gipa Category ge·brio senior ong·ani kri bilsianti ra·dochina, me·chik Muster Roll-rangna Maternity Leave-ko on·china, department ge·antini Muster Roll-rangna jaanti hajirarangko somoi gita on·china aro 2009 bilsio Governor-ni order on·gipa bilsi 65-ko department ge·antion, kam ka·e cha·china aro bilsi 58-o Muster Roll-rangko retire on·jachina, on·gimin niam gita Muster Roll-rangna bilsi 65-ko on·china dabianggen ine Union-ni dilgiparang jinma baksa tik ka·angaha. Iani bidingo Skotong Minister aro PHE Minister-na memorandum-ko on·manaha. Inidiba iani result-ko re·baenggipa January jao Skotong Minister-ko grongtaio, Skotong Minister maiko agana uko jinmana parakatgen ine Pariat aganangaha.

Ia dabianirangko re·anggipa November jaon AJHMRWLU-ni dilgiparang a·dokni Skotong Minister-ko Shillong-o gronge memorandum-ko on·angaha. Unbaksana, December 12 tarik Sukrobar pringo PHE Minister Pa Marcuise N.Marak-ko Williamnagar-o gronge, apsan memorandum-kon on·angaha.

Indake, Muster Roll-rangni neng·nikanirangko namatchina JACMRWU-ni dilgiparang, re·baenggipa bilsini January jao Skotong Minister-ko gronge gisik ra·atpiltaianiko dakgen ine Pariat jinmana ku·rachakangaha.