Baghmara, Sept 21, 2025: South Garo Hills a·jani Mindikgre songni manderang Mindikgre songo Anti-Dacoity (AD) Camp-ko songe on·piltaichina songni dilgiparang aro Social Activist Greneth M Sangma, South Garo Hills a·jani Superintendent of Pulis (SP)-ko didiataha.

Greneth Sangma-ni parakatani gitade, South Garo Hills a·jani gitcham SP Abraham T Sangma-ni somoion Mindikgre songo AD Camp-ko songahachim, indiba Siju-o boma goprete a·sel ong·ani ja·man ia AD Camp-ko chipna nangaha.

Batanggipa 2021 bilsio, Meghalaya a·dokni Assistant Inspector General (AIG) of Pulis, Mindikgre songo Pulis Station-ko kulina gita proposal-ko on·ahachim aro ru·uta bilsirangonin Mindikgre songni manderang,ia songo Pulis Station-ko kulichina dabitokengani gimin ia songo AD Camp-ko kulianiara pulis station ba pulis outpost-ko kulina ja·ku de·chakatani ong·gen ine Sangma parakataha.

“Uni gimin Mindikgre songo pulis station-ko kulikujaskal AD Camp-ko songpiltaie, nanga kamrangko ka·chakatchina chinga nang·ko mol·molatenga” ine Greneth Sangma, South Garo Hills a·jani SP-na sedoatgipa chittio janapataha.