Shillong, Sept 21, 2025: Achik National Volunteers Council (ANVC) aro ANVC-B-ni Agreed Text of Settlement (ATS)-ni ning·o soi ka·grikanio pangchake, Garo Hills Autonomous District Council (GHADC)-ni tangka paisarangna neng·nikanio dakchakchina Meghalaya sorkari ma·mong sorkarioniko gong kror 664 lak 49 tangkarangko dakchakchina lekka sedoataha.

Ua tangkarangoniko, ja 43-na man·kugija dongenggipa, GHADC-o kam ka·giparangni dormaharangko gamna gita gong Kror 252 tangkarangko bi·ataha.

“India sorkari, Meghalaya sorkari baksa ANVC aro ANVC-B-ni soi ka·gimin Agreed Text for Settlement-o pangchake, GHADC-ni kamrangna aro nanganirangna, gimik gimang gong kror 664 lak 49 hajal 27 ritchagittam sotchetgni 382 tangkarangko dakchakatchina ma·mong sorkariko mol·molatenga. Uni gimin District Council-ni nanganirangna tangka paisarangko on·atchina anga mol·molatenga” ine Commissioner & Secretary in-charge Planning, Investment Promotion and Sustainable Development Department, Dr Vijay Kumar, Ministry of Home Affairs (MHA)-ni Secretary-na chitti seataha.

Ministry of Environment Forest and Climate Change, burung bolgrimrangni dingtang dingtang kamrangko ka·na gong kror 308 lak 14 hajal 27 ritchagittam sotchetgni 382 tangkarangni Project-rangkoba ra·chakaha ineba ua parakataha.

Solar Street Light-rang, songrangni antidamrangko namdapatanirang aro bolam bite ge·a gamanirang aro uarangoniko dingtang dingtang bosturangko tariani DPR-rang gong kror 104 lak 34 budget-koba on·ataha.

“Una agreba, District Council-ni kajinarang namen komiahani gimin, District Council-o kam ka·giparangni dormaharangko on·na man·aengani gimin, gong krir 252 lak 01,00,000-ni one time Grant-ko on·chinaba mol·molataha” ine Dr Kumar parakataha.

Indiba da·o dipet ia tangkarangko ma·mong sorkari on·ata dongkuja, ineba ua parakataha.