@ghdnews.in@

Tura, Dec 5, 2025: Tura-o donggipa St. Xavier’s Higher Secondary Skul-ko December 4 tarik Bristibar salo bilsi 75 gapaniko maniangaha. Bilsi 1950-oni 2025 bilsiona re·mikkangbaanio bilsi 75 gapaniko maniangaon, Platinum Jubilee Souvenir-ko parakatenba, Skul Campus-on maniangaha, jeon poraigipa bi·sarang, giljani dilgiparang, skigiparang aro ma·a-paarang aro gipinrang bakko ra·angtokaha.

Indake ia Jubilee-ko manianio Skotong Minister Conrad K Sangma mongsonggipa sokgipa ong·e bakko ra·angaha, unbaksa Tura Diocese-ni Bishop Rt. Rev. Andrew R Marak, Sister Marline Pinto, MCJ aro Sister Maria D’Silva, MCJ, Regional Directress- bakko ra·angaha.Platinum Jubilee Souvenir-ko parakate on·angaon, Skotong Minister, Skulni education sector-o dal·bee on·gilanina de·mittelangha aro Souvenir Committee-ni kragipa articles, photograph aro archival-rangko simsake seokanina mittelaha. St. Xavier Skul batanggimin bilsirangonin, bilsiantian seng·gipa student-rangko tarie Garo Hills-ni education sector-ko bilakatengani gimin de·mittelangaha.

Skotong Minister, tom·anio jinmana aganprakangengon, Meghalaya-ni demographic-o a·dokni manderang jela lak 38-oni atagrik manderangde bilsi 20-ni ning·o ong·giparang ong·a. Ian dal·begipa chol ong·an baksa dal·gipa daitoba ong·a. Chadamberangko mikkangchi namgipa ramaona dilangna namen ra·biani ong·a. Uni gimin education sector-ko bilakdapatna nangenga.Iarangni gisepon Skotong Minister jatni gamchatgipa dakbewal rikbewalrangko ripingna aganangaha. Uni gimin student-rangna Khasi aro Garo ku·sikko skie ra·na nangchongmotaniko nangnike compulsory dake donatna sorkari chanchiaha. Jatni daka-rika bewalrangko ripingna ku·tangko skie ra·aniara namen gamchata. Ia policy-ko ta·raken cabinet-o chanchirimgen.Skulna dakchakna gita Skotong Minister’s Special Development Fund-oniko skuna gital gariko on·na ku·chakaha, unbaksana skuni band-na musical instrument-rangko on·na gitaba ku·chakangaha.

St. Xavier’s Skuni bilsi 75 gapaniko maniengon, Bishop Andrew R Marak, Missionaries of Christ Jesus-ni Sister-rangko batanggimin bilsi 1950-oni bi·sarangna namgipa education-ko on·na dangdike on·engani gimin mittelangaha.
Indake poraienggipa bi·sarangko mikkangchi nambate rakbate poraiange skulna a·dokna mikkim rasongko ra·bachina didiangaha.

Ia program-o skuni student-rang cultural program-ko ong·ate chrokmesokangtokaha. Pirate Dance, Wangala Dance, Ballet Dance, aro Jubilee song-ko ring·mesokangjolaha.