Shillong, Sept 21, 2025: India sorkari, A·chik National Volunteer Council (ANVC aro ANVC-B) baksa soi ka·grikgimin gita Garo Hills Autonomous District Council (GHADC)-o kam ka·giparangna ja 43-ni dormaharangko on·na gong kror 250 tangkako on·ataha ine matnanganirang kakket ong·ja ine Sonibar salo a·dokni Skotong Minister Conrad K.Sangma parakatenba,
da·odipet a·dok sorkari ma·mong sorkarini on·atgipa tangkako man·sokuja aro iani bidingo mamingkon aganchaka dongkuja, ine aganaha.

State Planning Department-ni India sorkarina watatgipa chittiara, ANVC aro ANVC-B-ni Text Agreement-o pangchake tangjarangko watatchina mol·molanisan ong·aia ine Skotong Minister parakataha.

Ia mol·molaniko ma·mong sorkari man·soaha ine Skotong Minister a·dokni manderangko dakchakna ma·mong sorkariko mol·molatanio jaja jiji ong·jachina didiataha.

Ma·mong sorkarioniko da·odipet maming tangka man·soa dongkuja. Indiba a·dok sorkari, ia mamlako nirokangkugen aro ma·mong baksa agangrikatkugen, jedakode, ANVC aro ANVC-B-ni Text Agreement gita ma·mong sorkarioniko ta·raken tangkarangko man·sogen, ine Sangma ka·donganiko parakataha.