GHD News

ghdnews.in

Shillong, Oct 29, 2025: Garo Hills-ona ge·samangmang man·baenggipa, Tura Govt. Medical College-ko Public Private Partnership (PPP) mode-o chalaina sorkarini tik ka·anina, Garo Hills-ni dingtang dingtang NGO-rang, Civil Society Organisation-rang jegale, jingjengatanirangko dakangani ja·man, Tura Medical College-ko PPP model-o chalaijawaha, sorkarian chalaigen, ine Monggolbar salo Health Minister Wailadmiki Shylla parakataha.

Tura Medical College-ko PPP mode-o chalaina am·aniko Garo Hills-ni bang·a manderangan jegaltokahani gimin, PPP mode-ko ra·gatjawaha, manderangni nangnika gitan, Tura Medical College-ko sorkarian chalaina tik ka·aha ine Shylla parakataha.

“Sorkari-ara manderangnan kam ka·gipa ong·a, uni gimin manderangni namnikaniko man·ja dipetde, chinga uko dakjawa. Tura Medical College-ba sorkarinin ong·gen, ine chinga tik ka·aha,” ine Minister kobor ra·timgiparangna aganaha.

Unbaksana, ru·utgija somoirangni gisepon, Medical College-o skie on·giparangko seokanggnok, maina da·o Tura Medical College-ko rikanirang bang·bata kamrangan matchotaha aro Hospital-ko rikanisan matchotkujaenga, ineba Health Minister agandapataha.

Shylla an·tangba Tura Medical College-ko nina re·bagen aro ua Garo Hills-ona re·bana somoiko nichaksoenga ine agandapataha.