Shillong, Nov 20, 2026: Meghalaya a·dokni skigiparangko, ‘A·kinrang’ aro ‘Sogimin Biterang’ ine chonnikahani gimin, Deputy Chief Minister Prestone Tynsong-ko skigiparang jegalattokengon, skigiparangni kosako iandakgipa kattarangko aganahani gimin, warachakenggipa dolni dilgipa aro Songsak-ni MLA Dr Mukul M. Sangma suk ong·gijaniko parakataha aro uni agangipa kattarangna skigiparango kema bi·china Tynsong-ko didiataha.
Skigiparangni kosako iandakgipa kattarangko aganahani gimin, Dr Sangma suk ong·gijaniko parakatenba, uni ma·a paa sakgnian skigiparang ong·a aro songsalna bang·en on·gilgiparang ong·a, uni gimin Tynsong-ni agangipa kattarangna ua an·tangba gisik saaha ine ua parakataha.
“Anga uni agangipa kattarangna suk ong·jaha aro gisikba saaha. Iandakgipa kattarangko ua aganna nangjachim, maina anga an·tangba skigiparangni depante ong·paa aro angni ma·a paa sakgnian skigiparang ong·a” ine Dr Sangma aganaha.
Lok Sabha-ni gitcham Speaker P.A Sangma-ba uni ma·gipa pagipani chatroan ong·achim aro uaba uamangni skie on·anio poraigipa ong·achim, ine warachakenggipa dolni dilgipa aganaha. Uni ma·a paa skigipa ong·ani giminsa, ua an·tangba dilgipa ong·na re·mikkanganio tarina man·aha ine Dr Sangma aganaha.
Dr Sangma-ni parakatani gitade, skigiparangara lekka poraniosan ong·aigija a·dokni namroro silroroaniba bang·en on·gilgiparang ong·a, maina a·dokni mitam dilgiparangde, skigipani kamko ka·aonisa a·songna aro jatna kamko ka·na a·bachengaha, ua aganaha.
Tynsong saksa dilgipa ong·e, uni iandakgipa kattarangko agananina Dr Sangma suk ong·gijaniko parakatengon, Ua saksa Deputy Chief Minister ong·pileba, manderangna dangdike on·anio an·tangni daitokon gualaha ineba Dr Sangma matnangataha.
Deputy Chief Minister
an·tangni agangipa kattarangna skigiparango kema bi·china didiateba, ua kamoni neng·takgimin skigiparangko man·chape pilak skigiparangni kamrangkon mittelnasa nanga ine warachakgipa dolni dilgipa aro a·dokni gitcham Skotong Minister aganaha.
“Ua (Tynsong) kemako bi·na nangchongmota. Da·o kamoni neng·take donggiparangko man·chape, pilak skigiparango kemako bi·china, anga uko ku·pattina sika. Ua kema bi·genchimode angaba kusi ong·gen,” ine Dr Sangma aganaha.

