Tura, Oct 17, 2026: West Garo Hills District Boxing Association (WGHDBA)-ni sak 6 chadamberang Shillong-ni Raid Laban College-o ong·atanggipa, Under 15 Sub Junior State Boxing Championship (SJSBC)-o bak ra·angaha aro uarangoni ge 5 medal-rangko man·ahani gimin WGHBA kusi ong·e maniako dakangaha.

WGHDBA-ni sak 6 boxer-rang Gold medal 1, Silver medal 2, Bronze medal 2, gimik ge 5 medal-rangko man·baaha.

Bilsi 15-ni ning·o chong·motan, Under 15-o kal·susagipa chadamberang kg 57-60 category-o Immanuel Akangrik M. Sangma Gold Medal-ko man·aha. kg 50-52 category-o
Dedo R. Marak Silver Medal-ko man·aha aro kg 48-50 category-o Ariri Ch. Momin-ba Silver Medal-ko man·aha. Kg 44-46 category-o Chara Dechao R. Marak Bronze Medal-ko man·skaaha aro kg 40-42 category-o Jakrikra R. Marak-ba Bronze Medal-ko man·aha.

Ua kal·susaanio Team Manager Alan Dalkambe M. Sangma aro skie on·gipa ba Coach, Balnas A. Sangma-ni dilanichi Association-ni sak 6 chadamberang, ge 5 medal-rangko man·bae WGHDBA-na aro A·chik a·songna mikkim rasongko ra·baaha.

Iandakgipa kal·susaanio chadamberang gisiko miksonga gnang an·tangtangko on·kange krenganichi chu·sokaniko man·ahani gimin, team-ni manager aro coach, uamangko de·mittele kusi ong·chakaniko parakataha.