Tura, Oct 14, 2026: GHADC Election-ko jadokna ra·dodapattaie da·o ong·enggipa Executive Committee (EC) aro MDC-rang basako proposalko on·aha. Basako aro mai salo EC tom·e chanchienba bill-ko pass ka·e District Council Affairs (DCA) department-ona watdoataha. Cabinet-o approve ka·na skang ruling EC aro MDC-rang house-o chanchiahama. Uni Notification aro bill pass ka·ani sakkirang dongama. Donga ong·ode uko jinmana mesokna nangchongmota, dongjaode ian daksrukani kamsa ong·gen. EC-maming chanchiani gri aro bill-rangko pass ka·a gri uko skatang a·dok sorkari cabinet-o tik ka·e, ra·doataniara Garo Hills Autonomous District Council (GHAadC)-ni Sixth Schedule-na on·gipa bilko ra·sekdrae kamko ka·ani ong·a, Dimseng K.Marak parakataha.

Indake GHADC-o maming chanchia gri Cabinet-o ra·chake election-ko ra·doanide, an·chingni bilko ra·sekani aro jakkalsretani ong·enga, indake skatang dakako A·chik jat ra·chakna aro tom·tom nie dongna man·chongmotjawa, ineba Marak parakataha.

“Angni u·iani gitade, maming dakeba a·dok sorkari skatang an·tangtangni sika gita dakna man·ja. Official procedure donga, jekon maiba gelna man·telgijagipa obostarangni a·selo ra·doani dongode, uko District Council-sa chanchichengna nanga. GHADC election-ko re·anggipaarch jaoni jadokna ra·doe EC-ko rikenggipa MDC-rang iarangni gimin house-o chanchichengesa, uko Resolution ra·e house-o bill-ko pass ka·chengesa, District Council Affairs (DCA)-ona watatchengna nangachim, DCA uko Governor-na watatge, uko Governor officially approved ka·osa iade niam ong·gen. Cabinet-o tik ka·e ra·doanide niam gita ong·jani gimin iako ra·chakna man·jawa aro election-ko somoi gita ong·atna nanga” Marak dabiangaha.

Da·o Separate Electoral Roll (SER)-o pangchake constituency-rangko sualpiltaina nanganirangko pa·sike, uko cabinet-o tik ka·e election-ko ra·dodrakataniara pa·sikanisan ong·aia. Bebe gita election-ko ong·atmanchana sikode, SER-ko bill pass ka·e watatani ja·manon Special Electoral Roll-ko ta·raken tarina man·achim, indiba uko donchipani ja·mansa, September 28 tariko Governor Assent on·aha ine parakataha aro ua parakatgimin Gazetted Notification lekkao jekon manderangna mesokatachim, ua segimin lekkao competent authority-ni maming sign ba soi ka·ani chinrang dongja, ineba ua parakataha.

Delimitation Committee-ko songahaoba, nangana baten somoirangko jakkalaha, jekon batanggipa 2025 bilsini June 27 tariko songahachim. Uamangni Committee-ko songani somoionin kamko a·bachengaha je skanggipa Committee-ko K C Momin Chairman ong·e dilachim, uni sianga ja·mano Chairman-ko uni palo songjitna nangaiachim, indiba ua somoio NPP-chi dilanggipa EC gitcham member-rangko chu·gimik 2026 March jani 27 tariko chu·gimik Denotify ka·eming gital Committee-kosa songpilskaha. Ia gital Delimitation Committee-o member-rangko seokanio uan NPP Party-o Active ong·gipa manderangkosa Delimitation Committee-ni member ong·e kamna rimnapskaha, ine janapatenba, indake Party-tangni mandekosa Committee member-na seokaiode mikkang nitee kam ka·an baksana manderangni ra·chakna aro ka·dongchakna man·gijani ong·chongmota, ine Marak matnangataha.

Committee-ni member-rang kakket aro bebeo Delimitation-ni kamrangko ka·na manderangko seokengon, term bon·a bilsigni ba gittamrangna skangan seokna nanga aro jakgitelgipa manderangkosa chongmotan darang party-oba bak donggijagipa manderangkosa seokna nangachim, ong·jaode gimik party-nikon representative daken sakprakprak seoksrangna nangachim, jedakode manderangna ka·donganiko on·na man·genchim ineba janapataha.

GHADC-ni election-ko skango ja 6 da·o ja 6 chu·gimik ja 12-na ra·dodaptaitaie, A·chik jatni dakna nangenggipa kamrangko chu·sokatna jotton ka·e mesokaniara an·tangtangni ong·gijagipa kamrangko iarangchin pindapna chol ra·anisan ong·aia. Uan gisik aro ka·tongoni maming sikanide ong·ja, maina gisik ka·tongoni sikmanchae dakgenchim ong·ode, uko manderangni bil on·e seokatgimin bilsi 5-ni gisepon, chu·sokatna kamko ka·genchimoba bilsi bongani gisepo chu·sokatna man·jaoba, kakket ong·e nama miksongani dongode, electionko ong·ate kraa gita manderangna jakgitele dilgiparangko seoke antangtangni palo watate kamrangko ka·e chu·sokatnasa cholko on·genchim. Da·o election-ko ra·dotaitaie kamrangko chu·sokatna jotton ka·e mesokaniara manderangni bilko ra·sekdrae kam ka·ani aro an·chingna, India a·songni niam bidiko on·gimin, democracy ba jakgitel ong·ani bilrangko bilgriata ine Marak suk ong·gijaniko parakataha.