Rangsakona, Oct 4, 2026:: Baratiya Janata Party (BJP), Tura City, South West Garo Hills a·jani Rangsakona constituency-o ‘Angan Ka Utsav’-ko maniangan baksa songsar-o an·sengbaljokanina dangdike on·enggipa ASHA Worker aro Anganwadi Worker-rangko mande ra·pilskaaniko dakangaha.

Ua somaio BJP Meghalaya Pradesh-ni State President, Rikman G Momin dongpae, ja·pang ja·diloni an·seng-baljokanina dangdike on·anian chong·motgipa miksongani ong·a, an·chingni Anganwadi aro ASHA Worker-rang an·tangtangko on·kange ma·giparangna, bi·sarangna aro nokdangrangni manderangna an·seng-baljokanina dakchakaniko on·enga. An·chingni a·songo Anganwadi centre-an songsaro mongsonggipa institution ong·a ine aganaha.

Uandake ‘Angan Ka Utsav’ ingipao pangchake Anganwadi aro ASHA Worker-rangko mande ra·aniko dakangan baksa “ Seva Mera Yogdan” ingipao Person with Disabilities (PwD)-rangna nanggipa bosturangko suale on·angaha.

Indake program-o State President baksana BJP State Secretary Anzie A.Sangma, Tura City Committee-ni President Anish M Sangma, General Secretary Raksrang A Sangma, State Mahila General Secretary Rakhi K Sangma dongpae bak ra·angaha.