Chokpot, Oct 4, 2026: South Garo Hills a·jao donggipa Chokpot jolni namgnirangna October 3 tariko, song Nokmarang, Nokma Sani Union,  NGO-rang jekai ACHIK, GSMC, ADIL, DIMDAM, GSU Chokpot Regional Unit, Multi Facility Centre-o tom·e chanchirimaha.  

Tom·anio mongsongipa Tura-ni Pa Jesswell Ch. Marak Nokma Sani Union-ni Padot,  “Chonga Nokma Sani Union A·chik A·somg gimik re·roroe Nokma-ni bilakaniko agan-talate on·enga. Nokmarang namen bilaka. Skatang gipin  manderang songo noko gipin songoni napna man·ja. Gipin jatarangde Sixth Schedule Administrative dongani gimin napnan man·srangja, indiba da·alo an·ching an·tangtangni bilkon gualangengaha. Uni gimin chinga gimik Nokma-onan re·e doe ku·monganiko on·engaha” ine jinmana aganangaha.

GSMC-ni Chairman Te Balkarin Ch Marak, “Nokgipa A·chik A·songna chu·gimik nanganikon on·aha, indiba da·alo simsakgija jakkale gimaatahaode, darangni kosakoba jaksi otna man·jawa. Indiba dedrang su·drang angni ma·gipa pagiparang gimaataona sokata ine matnangako man·gen. Uni gimin hai A·chik A·songni bilko ripingna krengna mingsingipa manderang aganna ku·rang gimahaode aro jatna gam·ara una an·ching Garo-rangni gisepode, M.A. English-ko poraie matchotchengopa aganna, “Darang Do·an ku·tangkosa knatonikbata ina”, ine A·chik ku·sikko ripingna. Re·anggipa 2025 bilsio New Delhi-o President Ma Droupadi Murmu-ko grongon, A·chik ku·sikko Eight Schedule-o napataniko namnike janapaha. Hai an·ching man·e cha·begipa A·chik ku·siko ripingna seanio, agannanio chasong gipinna donnangna” ine aganangaha.

Unbaksana GSMC-ni Co-Chairman Pa Junestemy R Marak, “An·ching A·chikrangna Sixth Schedule-o India-ni ma·ambio pangchakna on·jok, una an·ching an·tangtangko Rasong chana nanga. Sixth Schedule a·jaon Administrative ba gangopchina bilko on·aha. Uni gimin on·gimin bilko simsake ripingna nangchongmota, skatang environment-ko rusoe galjana, ong·jaode, buring bolgrimna ka·sajade a·gisi ong·gen, hai songtang noktangna ka·sae jakkalna” ine aganangaha.

ADIL-ni Padot Francis C. Marak, “An·chingni bilgrianiara dilgiparangni a·sel ong·enga, maina politics, official, kakket ramako re·diljani a·sel ong·a. Uni gimin kakketgipa dilgiparangko nanga. Chonchonna nanganirangko songni nokni manderangna on·na nanga” ine ua talatangaha.

ACHIK-ni IT Secretary Pa Johny A. Marak, “A·chikrangni nangnikaniko chu·sokatna ACHIK dol pangnan kang·kare kaa. Gipin biaponi re·bae, A·chik A·songko ra·sekaniko bilaken dakgrikna nanggen. Uni gimin A·chikrang kakket ramako pangnan ja·ku ga·a. A·chik me·chik gipin jatko kima donganiko ra·chakna man·ja maina, A·chik nokdangko a·kangna man·chongmotjawa” ine aganangaha.

GSU Chokpot Regional Unit-ni Padot Jish A. Sangma, “Chinga Chokpot jolo namen neng·nikanirang bang·bea uko gimik NGO-rangba niroke dakchakpachina mol·mola, Chokpot Degree College, Residential Skul, Multi Facility Centre ba Farmers Market, GDC building, UDISE-na neng·nikanirang gnang iarangko chu·sokate on·pachina mol·molangaha”.

Indake jinma tom·bimonganio mongsongipa mikkangchi ra.chakgnirangara skanggipa 2026 bilsioni Chokpot Degree College-ko matchotatna nanggen. Gnigipa Residential Skulko matchotatana nanggen.Gittamgipa Multi Facility Centre Building unia GDC-ni buildingko ta·raken matchotatana nanggen. Brigipa skigiparangko UDISE ka·na ong·gija dakdraatna nangja.
Bongagipa Tura-oni Siju-ona A·sakgre gita napake re·gipa ramako ta·raken tarina nanga. Chokpot-oni Baghmara Chengbagre-ona re·gipa ramako ta·raken tarie on·na nanga. Dokgipa Degree College-na a·a on·gipani gimin Nokmarangna unia songni manderangna maikoba on·pilskana nanga, ine GSU dilgipa didiataha.