Tura, Oct 3, 2026: Garo Hills-ni dingtang dingtang NGO-rang, Civil Society Organisation-rang aro A·chik a·songni manderang ru·uta bilsirangonn Garo Hills Autonomous District Council (GHADC)-o Separate Electoral Roll (SER)-ko tarichina dabiahani gimin, re·anggipa August 10 tariko Dhormonath Sangma-ni dilenggipa EC GHADC Budget Session-o ia bill-ko pass ka·e, a·dokni Governor-ona watataha. Indake ia SER Bill-ko Meghalaya a·dokni Governor CH Vijayashankar, September-ni 27 tariko ra·chakahani gimin, West Garo Hills a·jani dingtang dingtang NGO-rang, a·dokni Governor CH Vijayashankar, a·dokni Skotong Minister Conrad K Sangma, GHADC-ni Executive Committee aro Garo Hills-ni manderangko mittelpilangaha.

GHADC election-na taridapgimin niamrangko a·dokni Governor, September-ni 29 tarik Mongolbar salo ra·chakani ja·man Budbar salo Meghalaya sorkari, GHADC (Second Amendment) Rules, 2026-ko a·dokni Gazette-o segataha.

Ia taridapgimin niamrangara, GHADC election-na dingtang electoral roll-ko tariani, GHADC election-o susagipa aro pu·ongiparangna Scheduled Tribe (ST) ong·na nangaha. Unbaksana voting age ba pu·ongipani bilsikoba bilsi 21-oni bilsi 18-ona ra·onataha.

Indake ia niamrangko pass ka·na krenge kamrangko ka·dilahani gimin, Garo Hills-ni dingtang dingtang NGO-rang, a·dokni Skotong Minister Conrad K Sangma aro GHADC-ni Executive Committee-ko mittelpilangaha. Ia niamrangko ra·chakahani gimin NGO-rang, a·dokni Governor CH Vijayashankar-koba mittelpilangaha.

GHADC-na dingtang electoral roll-ko tarichina dabianio bakrimaniko on·ahani gimin NGO-rang, Garo Hills-ni manderangkoba mittelpilangaha.

Ia kamko chu·sokatna bi·anirangchi dakchakaniko on·ahani gimin NGO-rang, Garo Hills-o dingtang dingtang mondolini dilgiparangkoba mittelangaha.