Tura, August 27, 2026: Tura-o gnigipa changna, Pa Sonaram R.Sangma-ni siani bilsi 110 gapaniko ACHIK dol, New Tura Law College Field-o August-ni 27 tariko maniangaha. Ia chang 110-gipa Sonaram R.Sangma-ni siani salko maniaona Assam-ni gitcham Deputy Speaker Dr. Numal Momin mongsonggipa sokgipa ong·e sokbaaha. Unbaksana Border Socio Awareness, All India National Seema Jagaran Manch-ni Coordinator Pradeepan Kumar, guest of honour ong·e bak ra·angpaaha.

Uandake Pa Sonaram R.Sangma-ni siani salko gisik ra·e maniangan baksana A·chik Conscious Hoslistically Integrated Krima (ACHIK) dolni chang 4-gipa Foundation Day-koba maniangjolaha.

Indake chang 4-gipa ACHIK dolni Foundation Day-ko maniaona Garo Hills-ni dingtang dingtang NGO-ni dilgiparang bak ra·angaha. Ia Program-ko a·bachengna skang ACHIK dolni Nisanko badalate, A·chik a·songna ring·mitelani ja·mano, Pa Sonaram R.Sangma-na bibalni chokchimrangko done, mombati so·e minitsana jrip donge mande ra·aniko dakangaha.

Dr. Numal Momin, jinmana ganprakangengon, Pa Sonaram R.Sangma-ni bilsi 110-gipa siani salko gnigipa changna Tura-o ong·ate, an·tangko okamatanina ACHIK dolko mittele aganangaha. Pa Sonaram Sangma, A·chikrangoni skanggipa North East-o Bristish sorkarini kosako jakgitelna dakgrikdilchenggipa ong·a. Ua A·chik jatko British sorkarini dormaha gri begal olataniko, A·chik a·aongni buring bolgrimrangko ripingani gimin dakgrikangaha. Uandakgipa dilgiparangko an·ching gualenga, uko mande ra·na krachongmota ine Dr Momin aganangaha.

An·ching A·chikrang ku·mongani dongja, uni gimin, gipin a·dokrango dongenggipa A·chikrang baksa ku·monge, ge·sa Forum-ko kulichina didiangenba, anga an·tangba man·a dipet dakchakaniko on·pagen ine Momin ku·mongangaha.

Re·anggipa March jao GHADC-ni election-o susaenggipa candidate-rangna ST Certificate-ko mandatory dakna dabie dakgrikanio rim·a man·e, jailo donggiparang aro case ka·ako man·gipa dingtang dingtang NGO-ni dilgiparangna aro chadamberangna ACHIK dolni gita, dingtangmancha gisik ra·aniko dakna Momento-rangko Dr Momin-ni jakchi suale on·angaha.