Dadenggre, August 19, 2026: West Garo Hills a·jani Dadenggre Constituency ning·o donggipa Rome-oni Gambarigre-ona tarienggipa ramako name tarijaenga ine manderangni badi ka·anirangko man·soani ja·man, Dadenggre-ni MLA Rupa M. Marak, PWD-ni Official-rangko okamate, ua kamko jako ra·e ka·enggipa manderang baksa August 17 tarik Sombar salo re·ange nirok sandianiko dakangaha.

Jolo songdongenggipa manderangni parakatani gitade, ia ramako jako ra·e tarienggipa manderang name kamrangko ka·jani a·sel, black topping on·giparang jasani gisepon nosto ong·aha aro tarigimin ramako jaksichi akcharke galna man·aiani gimin, name tarichina aganoba knachakja ine parakataha.

Indake ong·engon, Rome-oni Gambarigre-ona tarienggipa ramako MLA Rupa Marak baksa PWD-ni Official-rang an·tangtangan a·damona re·ange niahaon, rama taria namgijako nikaha aro namgija tarigipa ramako, Details Project Report (DPR), gita name taripile on·gen ine PWD-ni Official-rang, Rupa M Marak-na ku·rachakangaha.

Apsan salni bakon Dadenggre Block-oni Community Health Centre (CHC)-ona re·gipa ramao culvert tarigipa home-pipe chonani a·sel, mikka wachini somoio chiring dal·e, chirang name jokangna man·jae, sepango donggipa dokkanrangko chi ripenga aro hospital-ona re·na gita jolni manderang namen neng·nikaniko man·enga, ine badi ka·aniko man·soe, ua ramako niangani ja·man, dal·bate aro name taripilna nangenga ine nikaha. Uko name taripilchina, PWD Official-rangko MLA didiangahani gimin, official-rang name taripilna ku·rachakangaha.

Indake kamrangko nambate kam ka·china didiangenba, MLA an·tangan ua kamrangko nirokjringgen aro department-ni ku·rachakgimin gita, name chu·sokatgen ine Marak ka·donganiko parakataha.