Tura, Oct 4,2024: Bangladesh a·songoni niam gri napbagipa sak 17 manderangko Bristibar salo, West Garo Hills a·jani pulisrang rim·taiaha. Ua sak 17 manderangoni sakgnide me·chikrang ong·achim.

Iana skangba Bangladesh a·songoni niam gri napbagipa sak 12 manderangko, West aro South West Garo Hills a·jarangoniko pulis-rang rim·ahachim.

Koborni gitade, Bangladesh a·songoni niam gri napbagipa sak 17 manderangko pulisrang Bristibar pringo, Guwahati aro dingtang dingtang biaprangona re·angmiting somoio Hallidayganj Pulis Station-oni adita chel·ao donggipa Sobribari songoniko rim·aha.

Rim·ako man·gipa manderang bang·batan Karnataka aro Tamil Nadu a·dokrangchi kam ka·e cha·na re·angengachim ine pulisrang u·iataha.

Rim·ako man·gipa manderangara bilsi 28 ong·gipa Sharif Roy, bilsi 22 ong·gipa Chayan Roy, bilsi 22 ong·gipa Nahid Sheikh, bilsi 19 ong·gipa Mizanur Sheikh, bilsi 26 ong·gipa Habib Sheikh aro Alamgir Sheikh, bilsi 20 ong·gipa Shabbir Sheikh, bilsi 25 ong·gipa Saidul Islam, bilsi 35 ong·gipa Shipon Sheikh, bilsi 26 ong·gipa Maroof Sheikh, bilsi 18 ong·gipa Amin Sheikh, bilsi 18 ong·gipa Rajab Ali, bilsi 38 ong·gipa Kabir Sheikh aro Md Robiul Islam, bilsi 32 ong·gipa Kabir Sheikh, bilsi 22 ong·gipa Shabana Sheikh aro bilsi 18 ong·gipa Parul Sheikh ong·achim.

Ua manderango sing·sandianiko dakon, uamangko India a·songchi re·bana gita Bangladesh-ni mande saksa dakchakataha aro uamangna tol·e Aadhar card-rangko tarie on·aha ine rim·a man·gipa manderang aganaha.

Ua manderang, Dalu sima gita India a·songona re·napbaaha ine parakaha.
Bangladesh a·songo so·sojengjeng ong·anirang namsrangkujaengani a·sel dokkol ka·ako man·enggipa manderang a·song damgnini sima ari gita India a·songona napsrukbana jotton ka·skaenga ine nikna man·aha.

India aro Bangladesh a·songni simarangko fencing kae, niam gri napsrukbaaniko champengsona jotton ka·engoba Bangladesh a·songni manderang, niam gri chibimarang gita, a·brirang gita aro dikbegipa buringrang gita napdrabaenga.

Bangladesh a·songo so·sojengjeng ong·engani gimin, India a·songona napsrukbagen ine ma·sisoenba BSF aro Meghalaya Pulisrang, dingtang dingtang biaprango mikrake nirok sandianirangko dakenga, indiba batanggipa salsnini gisepon Garo Hills-o bang·en Bangladesh a·songoni niam gri napsrukbagipa manderangko rim·na man·engaha ine pulisrang parakataha.