Tura, Oct 17,2024: Re·anggipa Butbar pringni 2 bajimango Tura Super Market sambao donggipa dokkanrangko wa·al kamgopaha aro ua dokkanrangko wa·al kamanio bang·a bosturangko kamchape bang·en noksan ong·atako man·tokaha.
Tura bajarni dokkanrangko wa·al kamani a·selara dokkan ge·sao bijoli nosto ong·ani a·selsa wa·al kamaha ine pulisrang chanchichipenga.
Ua wa·al kamani bidingo sing·sandianiko dakon, Butbar pringwalni 2 bajimango wa·al kamchakataha aro ge 13 dokkanrangko chu·gimik wa·al kamgopaha ine Official-rang parakataha.
Tura bajaro wa·al kamani bidingo kobor man·siani bakan Tura Fire Emergency & Service-ni wa·al kimitgipa garirangko ua biapona watataha, indiba wa·al kamako kimitna amchakjahani gimin, Rongram Fire Service-ni garirangko okamataha ine u·iataha.
Bol 5 wa·al kimitgipa garirangko wa·al jakkalaha aro walgimik wa·al kimite, Butbar pringosa chu·gimik kimitna man·aha ine Official-rang u·iataha.
