Tura, March 31, 2026: East Garo Hills a·jani Dorakgre A·kingni ning·o niamgri Nokma songe on·anina, GHADC-ni gitcham Deputy CEM, Nikman Ch Marak, Tantul M Sangma aro Renubala T Sangma-ni kosako Dorakgre A·kingni Nokma Rikme T. Sangma, Chiading Pulis Station-o badi ka·aha.

Rikme T.Sangma-ni aganani gitade, uni ma·apa siani ja·mano ua Dorakgre songni Nokma ong·rikaha. Nokmani niam gita, GHADC-o see rakkigimin Nokmako Tantul M Sangma, Renubala T Sangma aro gipinrang GHADC-ni Land & Revenue In-charge-na badi ka·enba, Nokmako den·galchina dabiaha. Indake ong·genchimoba, kakketgipa aro chong·motgipa lekkarangko mesokna man·jae aro sakki dongjae, GHADC Court-o badi ka·giminko uamang, 2025 bilsini November 28 tariko ra·galpilna ga·akaha.

GHADC court-o mamingba sakkiko mesokna man·jani gimin, mokordoma ka·ako ra·galgenchimoba, maming u·iatani gri, chong·mot Nokmako ra·galgija aro namedake sing·sandigija, apsan badi ka·gipa manderangkon niamgri, Dorakgre A·king-ni Nokmana ia bilsini February 27 tariko gitcham, Deputy CEM, Nokma songe on·angaha ine Dorakgre-ni A·king Nokma Rikme T. Sangma aganaha.

Rikme Sangma-ni badi ka·gipa lekkao janapatani gitade, Dorakgre A·king Nokmani ma·ambioni ong·bagipa manderangni bimingrangko uamang tol·e tariaha. Indake uamang Nokmani biapko ra·sekna jotton ka·enba, Nokmani nokdangna aro ma·drang maharina namgija bimingko ra·bana aro Dorakgre A·kingo tom·tome donganiko nosto ka·na miksonganio tol·e an·tangtangko Nokma songdrakaha ine Sangma parakataha.

GHADC-ni gitcham, Deputy CEM, manderangni lekkarangko GHADC-o rakkie donengako simsakgija jakkalsretaha, ine matnangenba, A·king Nokma dongengani kosakon niamgri tol·e Nokmako songe on·anina, A·king Nokmako chonnikani ong·a. Uni gimin namedake am·sandianirangko dakenba, ia sakgittam manderangni kosako ra·ka jakurangko de·china, Dorakgre-ni A·king Nokma Chiading Pulis Station-ni Officer In-charge-ko mol·molangaha.