Resubelpara, May 21,2025: Meghalaya Pulis Recruitment ba gipin kamrangna porikka ra·aniko Robibar salo ong·atrongengani gimin Meghalaya Pradesh Youth Congress (MPYC) raken jegalataha.

MPYC-ni General Secretary Chireng Peter Marak-ni parakatani gitade, Robibar salara Kristianrangni olakkiani aro neng·takani sal ong·a. Meghalaya a·dokara Kristian a·dok ong·a, uni gimin Robibar salara Kristianrangna namen dingtangmanchagipa sal ong·ani gimin Robibar salo kamna porikka ra·aniara ra·chakna man·gijani aro kragijani ong·a.

Re·anggipa May 18 tarik Robibar salo, Meghalaya Pulis-ni Recruitment-ko ong·atahani gimin suk ong·gijaniko parakatenba, “NPP-ni dilenggipa Meghalaya Democratic Alliance (MDA) sorkarini dingtang dingtang kamrangna Robibar salo porikkarangko ong·ataniara changsasan ong·jaha, indiba bang·a changon Robibar salosa ong·atrongbata. Ian Kristianrangni olakkianiko aro bebera·aniko sorkarini kamna nichanggalaniko mesokani ong·enga,” ine MPYC-ni General Secretary Chireng Peter Marak parakataha.

Manderangni toromo bebe ra·aniko mande ra·ani pal a·dok sorkari, batanggimin somoirango chu dokkanrangko ‘Heaven Eleven’ ine mingna on·aha ine matnangatenba, “Iandakgipa sorkarini kamara, jinmani mikkango uamangni a·kanganirangko dingtangate mesokani ong·enga aro jatni daka rikanisan ong·aigija, manderangni bebera·anio sorkarini kamna jajrengna nanganiko ong·ata,” ineba MPYC-ni General Secretary parakataha.

Meghalaya Pulis Recruitment-ara ma·mong sorkarini ong·ja, indiba a·dok sorkarini kamsa ong·ani gimin, Robibar salrango ong·ataniara kraani ong·ja ine janapatenba, porikkani tarikrangko a·dok sorkari, Robibar salo ong·atgija gipin salrango ong·atna nanga ine MPYC a·dok sorkariko didiataha.

A·dok sorkarini iandakgipa kamrangara BJP sorkari baksa apsan ong·enga, ine matnangatenba, a·doko songdongenggipa Kristianrangni namgnina indakgipa porikkarangko Robibar salrango ong·atjachina aro gipin salrango ong·atskachina MPYC didiataha.