Tura, Nov 9,2024:Bilsianti Dama Bol 100-ko Doke Wangalaniko ba 100 Drums Wangala Festival-ni bilsi 50 gapaniko re·baenggipa 2026 bilsio Dama Bol 1000-ko Doke Wangalna miksongenga ine Hundred Drums Wangala Festival Committee (HDWFC) parakataha.

HDWFC-ni Chairman Ronald Rikman Ch. Sangma-ni parakatani gitade, bilsignini gisepon Dama bol 100-ko Doke Wangalani ba 100 Drums Wangalani bilsi 50 gapna am·engahani gimin, Golden Jubilee-ko HDWFC dal·bate manina chanchisoenga aro iako manina da·onin kamrangko a·bachengengaha.

Ia bilsio chang 48-gipa 100 Drums Wangala-ko manienga, indiba da·o bilsignini gisepon bilsi 50 gapna siengahani gimin Golden Jubilee-ko maniani somoio dama bol 1000-ko doke Wangalaniko ong·atna chanchienga ine Rikman Sangma parakataha.

A·chikrangni daka rikanirangko ripingna aro chasong gitalni manderangna mesoke on·na Chibragre Wangala A·dam aro Garo Heritage Village-o Nokpante, Nokmong ba Nok A·chik aro Exhibition Centre-ko nokdonggaaha ineba HDWFC-ni Chairman parakataha.

“Exhibition Centre-ko kuliani miksongade Artist ba jakni kamrangko changgipa sapgipa manderangna cholko on·na miksonganian ong·a. Nokpante, Nokmong ba Nok A·chikko ia biapo rikaniara, mikkangchi A·chik chadamberangna jatni daka rikanirangko ma·sie ra·china miksonge rikanian ong·a” ine Rikman Sangma aganaha.

Re·baenggipa 2026 bilsio Golden Jubilee-ko maniao Dama Bol 1000-ko Doke Wangalaniko ong·atna miksonge,ia biapko dal·batatna kamrangko a·bachengatna miksongenga ineba HDWFC-ni Chairman parakataha.