Islamabad, May 15,2025:Pakistan sorkari bobil dolrangko jilani a·sel bobil dolrang kenmangija paraken dongenga. Prime Minister Shehbaz Sharif-ni dilenggipa Pakistan sorkari paraken bobil dolrangna an·tangni ka·saaniko parakataha.

Pakistan, Jaish-e-Mohammed (JeM) bobil dolni dal·batgipa Maulana Masood Azhar, Indian sipairangni “Operation Sindoor”-ko a·bachengate, chadrapani ja·man, uni nokdangoni sak 14 manderang so·otako man·ahani gimin, Pakistan sorkari una kror 14 tangkarangko cmpensation on·gen, ine parakataha.

Re·anggipa May 7 tariko Indian Armed Forces (IAF)-rang “Operation Sindoor”-ko a·bachengate, Pakistan aro Pakistan ‘Occupied Kashmir’ (PoK)-o bobil dolrangni ma·chakenggipa dam 9 biaprangko nosto ka·e galaha sak 100-na baten bobil dolrang so·otako man·aha.

“Operation Sindoor” ine bimingko done, bobil dolrangko a·jak sokani miksongara, re·anggipa April 22 tariko, Jammu aro Kashmir-ni Pahalgam-o sak 26 dos gri ramram manderangko chadrape so·otahani gimin, Indiani sipairang bobil dolrangko chadrape a·jak sokskaaha.

Pakistan, Prime Minister Office-oni u·iatani gitade, PM Shehbaz Sharif, jemangan Indian sipairangni chadrapanio so·otako man·ahachim, JeM bobil dolni dilgipa Azhar-na gong kror 14 tangkarangko relief package dake on·gen ine ku·rachakataha.

Unbaksana, Indian sipairangni chadrapanio saknaako man·gipa bobil dolni jikgipa, abitang, chawari, gritang, namchiktang aro sak bonga bi·sarangko man·gope uni nokdangna dakchakaniko on·gen, ineba parakataha.

Indiani sipairang, “Operation Sindoor” ko a·bachengate, Pakistan aro Pakistan Occupied Kashmir-ko nisan ka·anichi, ramram manderang aro sipai dolrangko chadrapaha ine matnangatenba, Indiani sima ario donggipa Pakistan a·dokrangko aro Pakistan Army-rangko rang·san nosto ka·e galaha, ineba Sharif parakataha.

Indake ong·genchimoba, US President Donald Trump-ni tom·tomgrikanina ja·ku de·e, agan ku·pattidile on·anichi, May 10 tariko a·song damgnian ma·sichakgrike, gogrikanirangko dontongna songgigrikaniko dakenba chandal mittugrikaha.