Shillong, Feb 25,2025: The National People’s Party (NPP) sak 18 MDC-rangni chakpaaniko man·ani ja·man, Jaintia Hills Autonomous District Council (JHADC)-o gital Executive Committee (EC)-ko rikna chanchiaha.
NPP-ni National General Secretary aro a·dokni Deputy Skotong Minister Sniawbhalang Dhar Sombar salo tom·e chanchirimani ja·man jinmana parakatengon,”Chinga Jaintia Hills-ni manderangko, kakket aro bebeo NPP-na ka·donge uamangni gamchatgipa vote-rangko on·anichi ge 13 seat-rangko cheahani gimin mittela” ine Dhar aganaha.
Rymbai-Khliehriat constituency-ni Independent MDC Violent Lyngdoh-ni NPP-o napani ja·man, NPP MDC-rang sak 14 gapaha ine ua parakataha.
“Ching baksa bakrimegipa UDP MDC-rang sak 3 aro Jowai South-ni Independent MDC Moonlight Pariat mangni chakpaaniko man·e, sak 18 MDC-rang baksa tom·aniko ong·ate, JHADC-o gital EC-ko rikna chanchiaha” ine Dhar parakataha.
Indake, uamangni tom·anio, Thombor Shiwat-ko JHADC-ni Chief Executive Member (CEM) songna chanchiaha ineba Dhar aganaha.
KHADC-o NPP-ni kam ka·ani namen bilgribeaha, “Chinga KHADC-o ge 4 seat-rangkosan man·aha. Chinga iani chong·mot a·selrangko sandigen” ine NPP dilgipa parakataha.
Jaintia Hills-o VPP-ni bil jak mesoke ong·gija kamrangko ka·ani gimin, NPP dilgipa matnangatengon, “Khasi Hills-o VPP ge 17 seat-rangko cheanina maming ong·ja, uamangni bil jakko jakkale kam ka·esa ong·aha. Uni gimin, indakgipa politics chingna mamingba ong·srangja, manderang uamangni rights-o pangchake kusi ong·na man·aia” ineba ua agandapataha.
“Khasi Hills-o VPP dam 29 constituency-rangoni ge 17 seat-rangkosan cheaha. Re·anggipa MP election-o uamangni bikbo bikbo chakgrime kam ka·aniko niatgenchimode, uamang Khasi Hills-ni chu·gimik dam 29 constituency-rangkon chegopna kraachim, indiba indake ong·na man·jaha. Uaoni ja 8 ba ja 9 mangsan ong·engkua uni gisepon, ge 29 seat-rangoniko ge-17 seat-rangkosan man·aiaha” ine Dhar matnangataha.
