Tura, Oct 5, 2024: North Tura constituency-ni gitcham MLA Noverfield R Marak, ru·uta salrangna be·enni saaniko man·e, Sukrobar attamni 5:30 bajimango Guwahati Hospital-o a·gilsakko watangaha.
Noverfield Marak bilsi 72 gape a·gilsakko watanggipa, batanggipa 2013 bilsini Assembly election-o Congress party tikito susae MLA seokako man·aha aro ua somoio a·dokni gitcham Skotong Minister Dr. Mukul Sangma-ni sorkario, Parliamentary Secretary ong·ahachim.
Ua (Noverfield) 2018 bilsini Assembly election-o NPP-ni candidate Thomas A Sangma-chi amako man·aha. Uni ja·mano ua Dr. Mukul Sangma-ni dilenggipa Trinamool Congress (TMC)-o napangskaaha.
Noverfield Marak Politics-ni kamrangko ka·na skang, Transport Department-o District Transport Officer (DTO) ong·e kamko ka·angaha.
Ua be·enni saaniko man·e, ia bilsio politics-ni kamrangko dontongna nangaha aro indita jarangna saaniko man·e, October 4 tarik Sukrobar attamo, an·tangni ka·sabegipa nokdangni de-su·drang, chawari demechirang, ripengskarang, noksulrang, Mahari-Ma·drangrangko wate jringjrotna neng·takram biapona rimangako man·aha aro uni ka·sagipa jikgipa una skangan a·gilsakko wate re·angsoahachim.
