Baghmara, Jan 10, 2024: Meghalaya a·dokni skanggipa Captain Williamson Sangma State University-ko Kristianrangni dakbewalo, bi·e pakwatna Education Minister Rakkam A Sangma-ni agananiko Khasi Jaintia Christian Leaders’ Forum (KJCLF) jegalataniko South Garo Hills a·jani Social Activist Greneth M Sangma jegalatskaenba, Meghalaya a·dokara Kristianrangni songdongenggipa biapan ong·ani gimin a·dokni State University-ko Kristianrangni dakbewalo jinma bi·e pakwatna miksonganiara namen kraneani ong·a ine parakatskaaha.
Captain Williamson Sangma State University-ko Kristianrangni dakbewalo bi·e pakwatna, Education Minister-ni parakataniko KJCLF-ni dilgiparang jegalatenba, lekka poraichakram biapko Kristianrangni dakbewalo bi·e pakwatna manchianiara, toromko mikkang niteani gita ong·enga ine parakatahachim.
Indake KJCLF-ni matnange seatgipa kattarangko South Garo Hills a·jani Social Activist Greneth Sangma jegalatskaenba, Meghalaya a·dokara Kristianrangni songdongchakenggipa biap ong·ani gimin a·dokni State University-ko bi·e pakwataniara a·dokni dakbewal rikbewal aro toromo bebera·aniko mesokanisa ong·a ine parakatskaaha.
“Anga saksa Meghalaya a·doko songdongenggipa ong·pae KJCLF-ni janapatgipa kattarangko anga raken jegalenga. Meghalaya a·dokara Kristianrangni jelbra jelsubatgipa a·dokan ong·a aro maming kamrangko a·bachengna skang bi·achi pakwataniara a·doko songdongenggipa aro Kristianrangni dakbewalko mesokani ong·a. Ian Meghalaya a·dokna dingtangtegipa kam ong·ja, pilak a·songrangon torom jelbatani kri apsan dakgipa ja·kurangkon de·ronga” ine Sangma parakataha.
