Baghmara, Jan 10, 2025: Dingtang dingtang manderangni aro Social Activist-rangni South Garo Hills a·jaoniko niamgri koela cha·ue cho·enga ine matnangani ja·man, GHD News-ni Reporter an·tangan, South Garo Hills a·jao donggipa Era Aning, Dobakkol aro Agreng songrangona re·ange Nokmarangko aro songni manderangko gronge sing·sandianiko dakeaha.

Era Aning songni Nokma, songni nokni dilgiparang, songni manderang aro chadamberangni aganani gitade, da·odipet Era Aning, Dobakkol aro Agreng songrango koela cha·ue cho·a dongja, manderangsa tol·e matnangenga.

Batanggipa 2014 bilsio koela cho·anirangko NGT-ni champengata dipet da·alona kingkingba ia jolrango koela cha·ue cho·a dongja. Da·o jekon Jadigittim aro Patalgittim jolo koela dandake donako nikengachim, uarangde gimikan skangonisa ong·a aro ua koelarangko South Garo Hills a·jani Deputy Commissioner-ni Auction ka·giminrangsa ong·a, ua koelarangkosa da·o salenga. Unbaksana Rongsa Awe-o dandake dongenggipa koelarangde, Nagaland-oniko ra·bae donenggipasa ong·a. Indiba koelarangko salengama salja ukode ma·sija ine songni manderang aganaha.

“Chinga koela cho·aniko dontongata, dipet songo noko namen neng·nikanirangko chagrongna nangaha, dedrangko chel·a biaprangchi poraina watatgiparangko tangka paisa dongjae, rimbapilna nangaha aro poraianirangko dontongatna ga·akaha. Chingni jolrango koela cho·e cha·na man·kugenchimode, indakgipa neng·nikanirangko man·jawachim. Nongalbibra jolni manderang dedrangko namgipa skul aro college-rango poraiatna chol dongjae, dedrangko brangataona sokataha. Chinga dedrangko dakchakna maming cholrang dongjaha, hajira ka·e cha·na nangaha aro bang·a chadamberangan skul poraina man·jae company-rango kam ka·enga aro hajira ka·e cha·na draatako man·aha. Uni gimin ia jolrango koela cha·ue cho·enga ine matnanganiara chingko mikbuani kamsan ong·aia, kakket ong·ja. Chinga Nongal jolo donggiparangsa an·tangtangni duk aro neng·nikanikode u·iaijok” ine ma·gipa saksa aro chadamberang suk ong·gijaniko parakataha.